Eftir­litið úti­loki sam­runa Kviku og stærri banka

Stjórnir Arion banka og Kviku banka tilkynntu eftir lokun markaða í gær að boðaður samruni bankanna hefði verið blásinn af. Bent var á afstöðu Samkeppniseftirlitsins sem ástæðu þess að viðræðum var slitið. Ármann Þorvaldsson, forstjóri Kviku, lýsir blendnum tilfinningum vegna þessa, í samtali við Vísi.

„Það voru mikil tækifæri þarna í að lækka kostnað og ég tel að það hefði skilað sér til neytenda og hluthafa og það eru auðvitað vonbrigði að því leytinu til. Hins vegar er það þannig að Kvika var náttúrulega á sinni skemmtilegu vegferð, sem við höfum verið á síðastliðin tíu ár og hefur gengið frábærlega vel, og þetta auðvitað gefur okkur þá tækifæri til þess að halda áfram á þeirri vegferð. Þannig að það er auðvitað mjög spennandi og ég held nú að starfsfólk hér inni sé alveg ánægt með þann hluta.“

Tilgangslaust að halda áfram

Ármann segir að stjórnir bankanna tveggja hafi gengið til svokallaðra forviðræðna við Samkeppniseftirlitið til þess að fá álit eftirlitsins áður en gengið yrði til formlegs samrunaferlis.

Eftir langt, ítarlegt og að mörgu leyti vel unnið ferli af allra hálfu hafi komið í ljós á fundi í gær að eftirlitið gæti ekki séð að samruninn yrði samþykktur.

„Undirliggjandi ástæðan fyrir því er að eftirlitið telur að Kvika hafi samkeppnisleg áhrif umfram sína stærð á íslenskum markaði og allar þær mótvægisaðgerðir, sem voru lagðar fram af hendi okkar og Arion til þess að mæta því, þau töldu þær mótvægisaðgerðir ekki nægjanlegar og við höfðum bara ekki fleiri útfærslur, sem virtust vera líklegar til þess að hljóta náð fyrir augum þeirra. Þannig var þetta og því tilgangslaust að halda áfram með ferlið.“

Samruni Kviku við stærri banka óhugsandi í augum eftirlitsins

Þá segir hann að það hafi verið túlkun allra aðila að afstaða Samkeppniseftirlitsins þýddi í raun að stóru bankarnir megi ekki kaupa Kviku en áður en gengið var til viðræðna við Arion hafði Íslandsbanki óskað eftir samrunaviðræðum við Kviku.

„Við lítum þannig á að það sé búið að svara þeirri spurningu, hvort að einhverjir af stóru bönkunum megi kaupa Kviku. Þannig að það er frekar skýrt í mínum huga.“

Fylgja eftir plani A

Ármann segir að Kvika hafi lagt fram plan árið 2024, sem bankinn hafi verið að fylgja þegar tilboð bárust um samruna frá Arion banka og Íslandsbanka, og nú verði því plani áfram fylgt eftir. 

„Það gengur í raun og veru út á það að halda áfram að vaxa bæði hér og í Bretlandi. En á sama tíma þá höfum við líka sagt að við búum við óvenju mikinn fjárhagslegan styrkleika þannig að við munum núna, þegar línurnar eru orðnar skýrar, nota tækifærið og koma umtalsverðum fjármunum til hluthafa í formi arðgreiðslna og endurkaupa og eins og við sögðum á uppgjörsfundinum sem var fyrir síðasta ár, þá erum við að gera ráð fyrir því að útgreiðslur til hluthafa muni nema á þessu ári eitthvað í kringum 15 milljörðum og engu að síður erum við að gera ráð fyrir því að vaxa mjög mikið á þessu ári og á næstu árum. Þannig það er planið.“

Pælir ekki í sveiflum til skamms tíma

Tíðindi gærdagsins virðast hafa komið illa við fjárfesta en gengi hlutabréfa í Kviku féll um 11 prósent í fyrstu viðskiptum í morgun. 

Ármann segist lítið velta sér upp úr gengissveiflum til skamms tíma og bendir á að eðlilegar ástæður séu fyrir lækkuninni.

„Þegar gengið var til samrunaviðræðna við Arion þá var það gert á grundvelli þess að Kvika yrði metin 20 prósent hærra heldur en þáverandi markaðsvirði í samrunanum. Og í ljósi þess að af samrunanum verður ekki og þar af leiðandi er vonin um þetta yfirverð horfin, fyrir utan möguleikann á samlegðaráhrifum sem hefðu líka komið, þá var kannski við því að búast að gengið myndi lækka.“