Daníel Ingi með stoðsendinguna að dramatísku sigurmarki

Rúnar Alex hafði fengið sjaldséð tækifæri í marki FC Kaupmannahafnar gegn Viborg í danska bikarnum á dögunum þar sem að hann stóð sig vel í 2-1 sigri og fékk því aftur traustið í leik dagsins. 

Gengi FC Kaupmannahafnar alls ekki staðist væntingar á yfirstandandi tímabili og að vera í neðri hluta dönsku deildarinnar er eitthvað sem stuðningsmenn liðsins sætta sig ekki við en Jordan Larsson kom liðinu yfir í leik dagsins með marki á 24.mínútu. 

Þannig stóðu leikar allt þar til á 78.mínútu þegar að Julius Berthel Askou jafnaði metin fyrir OB. 1-1. 

Skömmu eftir jöfnunarmarkið kom Rasmus Falk, fyrrverandi leikmaður FC Kaupmannahafnar, OB yfir 2-1 eftir vandræðagang í vörn FC Kaupmannahafnar og reyndist það sigurmark leiksins. 

Mögnuð endurkoma OB staðreynd en dapurt gengi Kaupmannahafnarbúa heldur áfram. Sigurinn gerir það að verkum að OB kemst upp fyrir FC Kaupmannahöfn í efsta sæti neðri hlutans og er þar með einu stigi meira en FC Kaupmannahöfn í öðru sæti neðri hlutans. 

Viktor Bjarki Daðason var fjarri góðu gamni í liði FC Kaupmannahafnar í dag.

Afar svekkjandi úrslit hjá Elíasi

Í efri hluta deildarinnar stóð Elías Rafn Ólafsson vaktina í marki FC Midtjylland sem fór illa að ráði sínu og tapaði á dramatískan máta gegn FC Nordsjælland. Daníel Ingi Jóhannesson kom inn á sem varamaður í liði Nordsjælland á 80. mínútu og lét heldur betur til sín taka  

Daníel átti stoðsendinguna að sigurmarki leiksins í uppbótartíma venjulegs leiktíma en þar varð Midtjylland af mikilvægum stigum í toppbaráttu deildarinnar. Nú er liðið fjórum stigum á eftir toppliði AGF sem á einnig leik til góða.