Sakar mótaröðina um að kúga kylfinga

Átta leikmenn fengu í síðasta mánuði undanþágu frá DP World Tour, heimsmótaröðinni sem var áður þekkt sem Evrópumótaröðin, til að taka þátt í LIV-mótum á þessu ári. Það gerir þeim kleift að halda aðild sinni og vera áfram gjaldgengir í Ryder-bikarinn.

Undanþágan fól í sér samkomulag um að greiða útistandandi sektir, sem sagðar eru vera um 2,5 milljónir punda, sem lagðar voru á fyrir að spila á LIV-mótum án leyfis frá DP-heimsmótaröðinni, afturköllun allra yfirstandandi áfrýjana og samþykki um að taka þátt í tilteknum mótum á DP-heimsmótaröðinni.

Tvöfaldur risamótsmeistari

Rahm er fyrrverandi efsti maður heimslistans og tvöfaldur risamótsmeistari og hann ætlar ekki að samþykkja þessi skilyrði. Hann hefur þó gefið í skyn að hægt væri að finna málamiðlun ef fjölda DP World Tour-móta sem þyrfti að spila yrði fækkað.

„Ég veit ekki hvaða leik þeir eru að reyna að spila núna. En það virðist bara eins og þeir séu að nota okkur til að hagnast á áhrifum okkar á mótum og sekta okkur og reyna að græða á báða bóga á því sem við höfum upp á að bjóða,“ sagði Jon Rahm.

Myndi þá skrifa undir í kvöld

„Það er bara eins og þeir séu að kúga leikmenn eins og mig og unga leikmenn sem hafa ekkert með pólitíkina í íþróttinni að gera. Ég sagði þeim reyndar að lækka þetta niður í fjögur mót, eins og lágmarkið segir til um, og ég myndi skrifa undir í kvöld,“ sagði Rahm.

„Þeir hafa ekki samþykkt það. Ég neita einfaldlega að spila sex mót. Ég vil það ekki og það er ekki það sem reglurnar segja. Mér líkar bara ekki við þessa stöðu. Mér finnst að við ættum að geta spilað frjálslega þar sem við viljum og haft val um að spila þar sem við viljum og ekki láta stjórna því hvað við gerum. Sérstaklega ég. Ég get ekki talað fyrir aðra, aðeins sjálfan mig,“ sagði Rahm.

Það mun ekki breytast

„Ég hef alltaf skuldbundið mig til að spila lágmarksfjölda [á DP heimsmótaröðinni] og ég held að ég hafi spilað fjögur mót, þar á meðal Opna spænska, á hverju ári nema einu sem atvinnumaður, og ég skuldbind mig til að gera það. Það mun ekki breytast. Ég ætla mér enn að gera það,“ sagði Rahm.

Afstaða hans gæti sett þátttöku hans í Ryder-bikarnum á Írlandi á næsta ári í uppnám, en hann hefur verið í síðustu fjórum liðum Evrópu.