Sturla biðst af­sökunar: „Ekki al­veg ég sjálfur þessa dagana og hugsa ekki skýrt“

Margir brugðust illa við því að hann deildi persónulegri sögu sinni á degi sem átti að vera gleðidagur annarrar norskra skíðaskotfimimanna. Holm Lægreid vill nú einbeita sér að Ólympíuleikunum og leggja málið að baki.

Það var eftir hefðbundna keppnisgrein á Ólympíuleikunum sem Sturla Holm Lægreid notaði tækifærið til að tala um framhjáhald sitt gagnvart þáverandi kærustu sinni og að hann sæi mikið eftir því. Fyrrverandi kærasta hans segir aðstæðurnar sárar og óumbeðnar af hennar hálfu.

Á sama tíma hafði Johan-Olav Botn unnið sín fyrstu Ólympíugullverðlaun nokkru sinni og gullverðlaunahafinn notaði tækifærið til að minnast hins látna Siverts Guttorms Bakken sem lést á hótelherbergi að undirbúa sig fyrir Ólympíuleikana.

Margir brugðust illa við tímasetningu Holm Lægreids sem var tilneyddur til að svara.

„Ég biðst innilega afsökunar á því að hafa deilt þessari persónulegu sögu á því sem var hátíðisdagur fyrir norska skíðaskotfimi. Ég er ekki alveg ég sjálfur þessa dagana og hugsa ekki skýrt,“ skrifaði Sturla Holm Lægreid í yfirlýsingu.

Holm Lægreid vann sjálfur bronsverðlaun í greininni.

„Afsökunarbeiðnin er til Johan-Olavs, sem átti skilið alla athyglina eftir gullið. Hún er einnig til fyrrverandi kærustu minnar, sem lenti óumbeðið í sviðsljósi fjölmiðla, ég vona að henni líði vel. Ég get ekki tekið þetta til baka en vil nú leggja þetta að baki mér og einbeita mér áfram að Ólympíuleikunum. Ég mun ekki svara frekari spurningum um þetta,“ skrifaði Sturla.

Í morgun sagði fyrrverandi kærasta Holm Lægreids VG frá því hvernig hún upplifði þetta allt.

„Ég valdi ekki að vera sett í þessa stöðu og það er sárt að þurfa að standa í þessu. Við höfum verið í sambandi og hann er meðvitaður um skoðanir mínar á þessu,“ skrifaði hún til VG en hún kom ekki fram undir nafni.