Fyrr­verandi kærasta Sturlu tjáir sig: „Sárt að þurfa að standa í þessu“

Fyrrverandi kærustunni finnst erfitt að fyrirgefa honum fyrir framhjáhaldið, jafnvel eftir ástaryfirlýsinguna.

Viðtalið við Sturlu vakti gríðarlega athygli, náði á forsíður um allan heim og dreifðist hratt á samfélagsmiðlum. Hann tók kannski bara bronsið en gull- og silfurverðlaunahafarnir féllu algjörlega í skuggann eftir viðtalið.

Fallegustu og bestu manneskju í heimi

„Fyrir hálfu ári kynntist ég ástinni í lífi mínu, fallegustu og bestu manneskju í heimi. Fyrir þremur mánuðum gerði ég mín stærstu mistök og hélt fram hjá henni, og ég sagði henni frá því fyrir viku. Þetta hefur verið versta vika lífs míns,“ sagði hann grátstokkin í viðtalinu,“ sagði Sturla Holm Lægreid að fyrra bragði við norska ríkisútvarpið eftir að hafa unnið bronsverðlaun á Vetrarólympíuleikunum.

Verdens Gang hefur verið í sambandi við fyrrverandi kærustu Holm Lægreid. Hún óskar eftir nafnleynd í þessu máli, ósk sem VG samþykkti þar sem hún hefur ekki leitað eftir athygli fjölmiðla vegna sinna einkamála.

Hún vill fyrst og fremst óska liðsfélaga Holm Lægreid, Johan-Olav Botn, til hamingju með gullverðlaunin í sömu keppni. Síðan snýr hún sér að viðkvæmara máli, framhjáhaldinu.

Erfitt að fyrirgefa

„Það er erfitt að fyrirgefa, jafnvel eftir ástaryfirlýsingu fyrir framan allan heiminn,“ sagði hún við VG.

Því yfirlýsing Sturla Holm Lægreid fór um allan heim. Viðtalið var aðalfrétt í öllum norskum dagblöðum, náði á forsíður stórblaða eins og New York Times, Daily Mail og þýska Bild. Þetta var líka stór frétt hér á Vísi. Auk þess fór myndbandið eins og eldur í sinu um samfélagsmiðla.

Valdi ekki að vera sett í þessa stöðu

„Ég valdi ekki að vera sett í þessa stöðu og það er sárt að þurfa að standa í þessu. Við höfum verið í sambandi og hann veit skoðanir mínar á þessu,“ sagði hún enn fremur.

Holm Lægreid sagði að framhjáhaldið hefði átt sér stað fyrir þremur mánuðum. Þáverandi kærasta hans fékk fréttirnar rétt fyrir Ólympíuleikana.

Ekki tilbúinn að gefast upp

„Ég sagði henni frá því fyrir viku og þá var það búið, auðvitað. Ég er ekki tilbúinn að gefast upp. Ég vona að með því að fremja félagslegt sjálfsmorð sýni ég kannski hversu heitt ég elska hana. Ég tek afleiðingunum af því sem ég hef gert. Ég sé eftir því af öllu hjarta,“ sagði Lægreid enn fremur.

Hún vill koma á framfæri þakklæti til þeirra sem standa henni næst.

„Til fjölskyldu minnar og vina sem hafa umvafið mig og stutt mig á þessum tíma. Einnig til allra annarra sem hafa hugsað til mín og sýnt mér samúð, án þess að vita hver ég er,“ sagði hún að lokum.