Svaf yfir sig og missti af rútunni

„Þetta svíður alveg ennþá. Það er svo stutt síðan. En ég er kominn yfir þetta og það er fullur fókus á þennan leik á morgun því hann er ótrúlega mikilvægur,“ segir Orri um leik gærdagsins og morgundagsins þar sem Ísland mætir Króatíu í leik um bronsið.

Aðeins hluti íslenska hópsins mætti á fjölmiðlahitting liðsins í keppnishöllinni í Herning í Danmörku í morgun. HSÍ hafði reynt að fá honum frestað vegna þess hversu snemma hann var skipulagður.

Líkt og greint var frá á Vísi í morgun mættu landsliðsmenn ekki upp á hótel fyrr en um miðnætti og áttu þá margir eftir að sinna sjúkranuddi eftir leik. Margir hverjir voru á nuddbekk til klukkan fjögur í nótt.

Þá var erfitt fyrir menn að festa svefn eftir svekkjandi tap fyrir Dönum í gærkvöld. Einhverjir fengu að sofa út á hótelinu og þá sumir þreytulegri en aðrir þegar komið var á fjölmiðlafund dagsins.

Orri átti fínasta leik í gær og var á meðal markahærri leikmanna Íslands. Hann átti erfitt með að sofa og missti þá af liðsrútunni þegar hún hélt frá hóteli landsliðsins í keppnishöllina í morgun.

„Ég að vísu missti af rútunni því ég hélt við færum af stað 10:30. Ég náði að koma hingað þökk sé Gulla (Jón Gunnlaugur Viggósson, starfsmaður HSÍ). Ég sofnaði milli þrjú og fjögur í nótt en síðan þurfti maður að mæta. Það er partur af þessu. Ég er svolítið þreyttur núna, ég viðurkenni það alveg,“ segir Orri og bætir við:

„Maður var ekkert smá svekktur að tapa því við vildum fara í úrslitaleikinn. En minn fókus er klárlega kominn á leikinn á morgun.“

Ísland og Króatía mætast klukkan 14:15 á morgun í leik um bronsið á EM. Teymi Sýnar mun fylgja liðinu áfram eftir hvert fótmál fram að leik.