Sjáðu Arsenal rúlla yfir Villa og Úlfana ná í stig á Old Trafford

Fyrir leikinn gegn Arsenal á Emirates í gær hafði Villa unnið ellefu leiki í röð í öllum keppnum.

Staðan í hálfleik var markalaus en í seinni hálfleik tók Arsenal öll völd á vellinum og vann 4-1 sigur. Gabriel, Martín Zubimendi, Leandro Trossard og Gabriel Jesus skoruðu mörk Arsenal sem er með fimm stiga forskot á toppi deildarinnar. Ollie Watkins skoraði fyrir Villa sem er í 3. sætinu, sex stigum á eftir Arsenal.

Wolves hafði tapað ellefu deildarleikjum í röð þegar liðið mætti á Old Trafford. Joshua Zirkzee kom Rauðu djöflunum yfir á 27. mínútu en Ladislav Krejcí jafnaði á lokamínútu fyrri hálfleiks og þar við sat, 1-1.

Öll mörkin í 2-2 jafntefli Chelsea og Bournemouth á Stamford Bridge komu á fyrstu 27 mínútum leiksins. David Brooks kom gestunum yfir en Cole Palmer (víti) og Enzo Fernández svöruðu fyrir heimamenn. Justin Kluivert jafnaði svo fyrir Bournemouth.

Danny Welbeck skoraði úr einni vítaspyrnu en klúðraði annarri þegar Brighton og West Ham United gerðu 2-2 jafntefli á Lundúnaleikvanginum. Jarrod Bowen og Lucas Paquetá skoruðu mörk Hamranna en í millitíðinni jafnaði Welbeck fyrir Mávana. Joël Veltman tryggði þeim svo stig þegar hann jafnaði í 2-2 eftir rúman klukkutíma.

Eftir þrjá leiki í röð án sigurs vann Newcastle United nýliða Burnley á útivelli, 1-3. Joelinton, Yoane Wissa og Bruno Guimaraes skoruðu mörk Newcastle en Josh Laurent mark Burnley.

Þá vann Everton Nottingham Forest, 0-2. James Garner skoraði fyrra mark Everton og lagði það seinna upp fyrir Thierno Barry.

Öll mörkin úr leikjum gærdagsins í ensku úrvalsdeildinni má sjá hér fyrir ofan.