Segir Norð­mönnum að setja hana í karlalandsliðið sitt

Reistad endaði á að skora tíu mörk fyrir Noreg og gefa sex stoðsendingar að auki.

Handboltalýsandi danska blaðsins B.T., Johnny Wojciech Kokborg, tók þetta saman í beinni lýsingu frá leiknum:

Setjið Sagosen á bekkinn

„Nú vitum við hvernig norska karlalandsliðið í handbolta getur nokkurn tíma sigrað Danmörku. Setjið Sagosen á bekkinn og setjið Henny inn. Hún getur allt,“ sagði Kokborg en norska ríkisútvarpið

Ummæli danska handboltalýsandans féllu í góðan jarðveg hjá nokkrum af norsku leikmönnunum.

„Það versta er að Henny hefði örugglega staðið sig vel í karlahandbolta líka. Ekki jafn vel og í kvennahandbolta, það verðum við að viðurkenna, en hún hefði kannski staðið sig vel á kantinum?“ sagði Maren Aardahl við norska ríkisútvarpið og hló þegar hún heyrði ummælin.

Ég get ekki verið sammála

Reistad sjálf fékk líka að heyra ummælin.

„Hahaha! Ég get ekki verið sammála, en ég skil ummælin,“ sagði Reistad og hló.

Í samtali við NRK segir Kokborg að hann beri mikla virðingu fyrir bæði Reistad og Sagosen og að þetta hafi verið skrifað í gríni.

Nánast enginn getur stöðvað hana

„Ég er bara svo hrifinn af Reistad, því mér finnst hún sprengja alla ramma í alþjóðlegum kvennahandbolta með algjörlega yfirburðaspili sínu. Hún er ótrúleg í sókninni. Hún getur allt og nánast enginn getur stöðvað hana,“ sagði Kokborg við NRK.

„Kannski tekur hún líka við af Katrine Lunde. Hver veit?“ bætir hann við.

„Gæðin hjá Henny Reistad eru yfirnáttúruleg,“ var dómur sérfræðilýsanda NRK, Kenneth Gabrielsen, eftir fyrsta hálftímann.

Stjörnuleikmaðurinn skoraði sjö af mörkum Noregs í fyrri hálfleik þegar Norðmenn tóku yfir leikinn.

Spilaði með kvef

„Hún er svolítið kvefuð, svo hún er í raun ekki alveg heil. Hugsaðu þér ef hún hefði verið það. Hún er bara 99 prósent í dag“ sagði aðstoðarþjálfarinn Mats Olsson við NRK í hálfleik.

Norðmenn mæta Þjóðverjum í úrslitaleiknum í dag. Þetta er þriðji úrslitaleikur liðsins í röð en vinnist hann verður norska kvennalandsliðið handhafi allra stóru titlanna því liðið varð Evrópumeistari fyrir einu ári síðan og Ólympíumeistari í París nokkrum mánuðum fyrr.

Henny Reistad hefur skorað 50 mörk í atta leikjum og er næstmarkahæst, fjórum mörkum á eftir hinni kúbersku Lorenu Delgado. Hún hefur nýtt 81 prósent skota sinna og aðeins skorað átta mörk úr vitum.

Reistad hefur alls komið að 76 mörkum, með 50 mörkum og 26 stoðsendingum, og það er það mesta hjá einum leikmanni á mótinu.