Arion banki sýknaður í vaxtamálinu

Hæstiréttur kvað upp dóm þess efnis klukkan 14. Hann hefur ekki verið birtur og því liggja forsendur hans ekki fyrir.

Málið er eitt fjögurra sem neytendur höfðuðu á hendur viðskiptabönkunum með fulltingi Neytendasamtakanna. Dómur féll í því fyrsta í október síðastliðnum og hafði gríðarleg áhrif á lánamarkað. 

Það mál var á hendur Íslandsbanka og varðaði skilmála í lánasamningi um óverðtryggt lán á breytilegum vöxtum. Hæstiréttur ógilti þá skilmála sem heimilaði bankanum að breyta vöxtum byggt á öðrum þáttum en stýrivöxtum Seðlabanka Íslands. Hins vegar féllst dómurinn ekki á að Íslandsbanki skildi greiða neytendum sem höfðuðu málið skaðabætur, þar sem þeir urðu ekki fyrir tjóni.

Ljóst var fyrir uppkvaðningu dóms í dag að vextir verðtryggðra lána yrðu ekki bundnir stýrivöxtum.

Breki Karlsson, framkvæmdastjóri Neytendasamtakanna, segir dóminn vonbrigði. Þessi dómur ólíkt Íslandsbankadómnum hafi ekki fordæmisgildi fyrir lán sem verið sé að veita núna, enda hafi hann snúið að lánasamningi sem gerður var fyrir gildistöku núgildandi laga um neytendalán.

Fréttin verður uppfærð.