„Ég hætti að stækka þegar ég var þrettán ára“

Hafdís er 193 sentimetrar á hæð, og samkvæmt frétt Handball World hæsti leikmaður HM, en við nánari athugun kom í ljós að austurríski markmaðurinn Andjela Roganovic er 194 sentimetrar á hæð. Hafdís er því næsthæsti leikmaður mótsins.

Ísland hefur spilað á móti Þýskalandi, sem er með mjög hátt lið að meðalhæð, og hina 187 sentimetra Violu Leuchter.

„Ég sá hana og hugsaði: Hún er risastór!.. en ég er stærri“ sagði Hafdís hlæjandi, en hún er líka vön því að vera sú hæsta í hópnum.

„Ég hef verið það lengi, ég hætti að stækka þegar ég var þrettán ára sko, þannig að fermingarmyndin er bara eins og ég veit ekki hvað. En ég hef aldrei verið eitthvað óörugg með það.“

Það hefur líka hagnast Hafdísi vel að hafa hæðina með sér í liði í sínum markmannsstörfum, en hugsaði hún aldrei um að spila einhverja aðra stöðu? Vera stór skytta og skjóta fyrir utan?

„Ég hefði kannski átt að fara á línuna, ég veit það ekki, það er bara í einhverju öðru lífi… Ég man líka að það var einn þjálfari í fimmta flokki sem sagði: Nú ferð þú bara í skyttuna… Svo prófaði ég tvær sóknir og hann sagði: Okei, beint í markið aftur“ sagði Hafdís þá.

Hæðina segir hún fengna frá fjölskyldunni, eða föðurættinni sérstaklega.

„Já, öll fjölskyldan er mjög hávaxin þannig að þetta kemur klárlega þaðan. Svo er föðurbróðir minn mjög hávaxinn, Hlynur Bæringsson, sem er í körfunni, þetta kemur líklega þaðan.“

Ísland mætir Færeyjum í lokaleik HM klukkan 19:30 í kvöld. Leikurinn verður í beinni textalýsingu á Vísi. 

Viðtalið við Hafdísi má sjá í spilaranum að ofan.