ÍR vann botns­laginn og sinn fyrsta sigur

Bæði lið hafa farið brösulega af stað í vetur en Þórsarar þó ögn betur og voru þeir með tvo sigra í þriðja neðsta sæti fyrir leikinn í kvöld. ÍR-ingar voru í leit að sínum fyrsta sigri og hann er nú kominn í hús.

Heimamenn í ÍR voru sterkara liðið í dag en eftir að hafa komist í 3-2 í upphafi leiks lét liðið forystuna aldrei af hendi. Þeir náðu um sex marka forskoti í fyrri hálfleik en staðan í hálfleik var 18-13.

Gestirnir að norðan voru þó ekki tilbúnir að gefast upp og náðu ítrekað að minnka muninn í tvö mörk svo að úr varð spennandi seinni hálfleikur. Nær komust þeir þó ekki og ÍR vann að lokum 34-30.

Markahæstir ÍR-inga voru þeir Baldur Fritz Bjarnason og Jökull Blöndal Björnsson með átta mörk og fyrirliðinn Sveinn Brynjar Agnarsson skoraði sjö. Þá átti Ólafur Rafn Gíslason góðan dag í mark ÍR og varði 16 skot.

Markahæstur allra á vellinum í dag var Þórsarinn Kári Kristján Kristjánsson sem skoraði níu mörk og Þórður Tandri Ágústsson skoraði sex.