Hjöðnun verð­bólgu í sjón­máli

Peningastefnunefnd tilkynnti fyrr í vikunni um lækkun á stýrivöxtum um 0,25 prósentustig til að vega á móti þrengingu á lánakjörum í kjölfar dómsúrskurðar Hæstaréttar í vaxtamálinu svokallaða. 

Verðbólga mældist 4,3 prósent í október og jókst á milli mánaða. Hækkun kostnaðar vegna húsnæðis og matvöruverðs höfðu þar mest áhrif að því er fram kemur í ársfjórðungslegu riti Seðlabankans. Hún er enn talsvert yfir markmiðum bankans. 

Að sögn Ásgeirs Jónssonar Seðlabankastjóra stafar þrálát verðbólgan undanfarin ár fyrst og fremst af framboðsskorti á fasteignamarkaði í kjölfar eldsumbrota á Reykjanesskaga og brostnum forsendum stöðuleikasamningsins svokallaða. Markmið síðustu lotu kjarasamninga hafi ekki gengið að óskum og launahækkanir óhóflegar í samræmi við það.

Ásgeir telur að jafnvægi fari að nást. 

„Við erum að spá því að það hægi á kerfinu, um leið hægir á vinnumarkaði og launahækkunum. Jafnframt erum við að sjá að einhverju marki fasteignamarkaðinn kólna,“ segir hann. 

Ásgeir ræddi efnahagshorfurnar við Kristján Kristjánsson í Sprengisandi á Bylgjunni í morgun. Hlusta má á viðtalið í heild sinni hér að neðan.

Hann segir hjöðnun verðbólgu í sjónmáli.

„Ég myndi halda það að við séum komin í umframframboð á fasteignamarkaði. Mér sýnist við vera að fara í kólnun. Við förum að sjá í sjónmáli verðbólgu fara niður og vonandi getum við þá farið að slaka á vöxtum,“ segir Ásgeir Jónsson Seðlabankastjóri.