„Versta mar­tröð Trumps“ kjörin borgar­stjóri New York

Demókratar unnu sigra víða um Bandaríkjunum í gær. Þannig tryggðu frambjóðendur þeirra sér einnig sigra í ríkisstjórakosningum bæði í Virginíu og New Jersey.

Þegar búið var að telja rúmlega 90 prósent atkvæða í borgarstjórakosningunum í New York var Mamdani með 50,4 prósent atkvæða og Andrew Coumo, sem bauð sig fram sem óháður en naut meðal annars stuðnings Trumps og auðjöfursins Elon Musk, 41,5 prósent. Cuomo. Frambjóðandi Repúblikana, Curtis Sliwa, hlaut mun minna fylgi.

New York verður ljósið

Hinn 34 ára Mamdani, sem var nær óþekktur fyrir fáeinum mánuðum, ávarpaði stuðningsmenn sína eftir að fyrir lá að hann yrði nýr borgarstjóri New York, sá 111. í röðinni. „Á þessum tíma pólitísks myrkurs, þá verður New York ljósið.“ Hann sagði kjósendur hafa veitt sér skýrt umboð til breytinga. Hann sagði sömuleiðis að hann gerði sér grein fyrir því að margir óttuðust að 33 ára maður myndi stýra New York-borg. „Ég hef ákveðið að bregðast við þessu. Á morgun verð ég 34 ára.“

Mamdani beindi einnig orðum sínum að Trump forseta sem hótaði í kosningabaráttunni að skrúfa fyrir fjármagn frá alríkinu ef Mamdani yrði kjörinn. „Donald Trump, ég veit að þú ert að horfa. Hækkaðu í tækinu því við viljum draga slæma fasteignabaróna til ábyrgðar. Því að „Donald Trump-týpurnar“ í borginni okkar líður orðið allt of vel að misnota leigjendur sína,“ sagði Mamdani.

Áfram hélt Mamdani. „Ef einhver getur sýnt landinu, sem Donald Trump hefur brugðist, hvernig á að sigra hann, þá er það borgin sem tryggði uppgang hans. Og ef það er einhver leið til að hræða einvald, þá er það með því að rífa niður það sem gerði honum kleift að tryggja sér völd.“

Kom eins og stormsveipur inn á hið pólitíska svið

Mamdani hefur heitið því að auka skatta á auðmenn borgarinnar, tryggja að frítt verði í strætó, ná stjórn á leigumarkaðnum og sömuleiðis koma á matvöruverslunum í samfélagseigu.

Kosningabarátta Mamdani hefur vakið mikla athygli en hann hefur notast við samfélagsmiðla og grín til að ná til kjósenda. Frumleg myndskeið hans þar sem hann kynnti skýra stefnu sína náðu mörg gríðarlegri dreifingu á samfélagsmiðlum svo athygli vakti. Kosningabaráttan hans var háð að stærstum hluta án fjármagns frá lobbíistum eða auðmönnum.

Flutti til Bandaríkjanna sjö ára

Zohran Kwame Mamdani er fæddur árið 1991 í Kampala í Úganda. Móðir hans er Mira Nair, þekkt kvikmyndagerðarkona og faðir hans, Mahmood Mamdani, er þekktur prófessor í nýlendufræðum og mannfræði við Columbia-háskóla. Foreldrarnir eru báðir fæddir á Indlandi og er móðirin hindúatrúar og faðirinn múslimi. Zohran er sömuleiðis múslimi en hann er eina barn foreldra sinna.

Fjölskyldan flutti frá Úganda til Suður-Afríku, en þegar Zohran var sjö ára flutti fjölskyldan til Bandaríkjanna og settist að í New York. Hann stundaði svo nám í afrískum fræðum og kom fram sem rappari undir listamannsnafninu Mr. Cardamom. Hann bauð sig svo fram og náði sæti á ríkisþingi í New York fyrir borgarhlutann Astoria í Queens.

Hann tilkynnti í október á síðasta ári að hann myndi bjóða sig fram til borgarstjóra í New York og var að lokum útnefndur frambjóðandi Demókrataflokksins.