Stálu hundruðum milljóna hjá Lands­bankanum

Málið uppgötvaðist hjá Landsbankanum á föstudaginn en það rataði á borð lögreglunnar á höfuðborgarsvæðinu á laugardaginn. RÚV greinir frá því að lögreglan á höfuðborgarsvæðinu hafi farið fram á gæsluvarðhald yfir fimm karlmönnum vegna málsins. Kröfunni hafi verið hafnað en mennirnir sæta farbanni. Samkvæmt heimildum Vísis er bæði um að ræða innlenda og erlenda karlmenn.

Tíu milljónum stolið hjá Arion banka

Rúnar Pálmason upplýsingafulltrúi Landsbankans segir að málið hafi uppgötvast á föstudaginn. Landsbankinn hafi greint orsök og umfang málsins og gripið til aðgerða til að koma í veg fyrir frekari misnotkun. 

„Tjón bankans gæti numið 200 milljónum króna en unnið er að því að endurheimta féð og gæti sú fjárhæð því lækkað,“ segir Rúnar. Landsbankinn taki málið mjög alvarlega en tekið er fram að viðskiptavinir hafi ekki orðið fyrir tjóni vegna þessa.

Haraldur Guðni Eiðsson, upplýsingafulltrúi Arion banka, segir að um eitt tilfelli sé að ræða hjá Arion banka upp á um tíu milljónir króna. Bjarney Anna Bjarnadóttir, upplýsingafulltrúi hjá Íslandsbanka, segir í skriflegu svari að málið sé til skoðunar en svo virðist ekki vera sem upp hafi komið slíkt mál hjá bankanum.

„Íslandsbanki hefur haft málið til skoðunar og unnið að því að greina umfang þess og hvort misnotkun á umræddum kerfum hafi átt sér stað hjá bankanum sem rekja má beint til veikleikans. Að svo stöddu virðist svo ekki vera. Málið er litið alvarlegum augum.“

Lokað fyrir möguleikann þegar svikin uppgötvuðust

Í tilkynningu frá Reiknistofu bankanna segir að við uppfærslu á kerfum hjá RB nýverið hafi skapast tímabundinn veikleiki sem hafi orðið til þess að við tilteknar aðstæður millifærðu nokkrir einstaklingar fjármuni af eigin reikningum án þess að inneign væri til staðar. 

„Um leið og svikin uppgötvuðust var lokað fyrir þennan möguleika í samstarfi við viðskiptavini okkar,“ segir í tilkynningunni sem Sigurður Örn Hallgrímsson, forstöðumaður þjónustustýringar og markaðsmála, sendir fjölmiðlum.

Stefán Örn Arnarson, aðstoðaryfirlögregluþjónn í fjármunabrotadeild lögreglunnar, segir málið hafa verið tilkynnt embættinu um hádegisbil á laugardaginn. 

„Sú upphæð sem við höfum til rannsóknar er í kringum 400 milljónir króna,“ segir Stefán. Neitun um gæsluvarðhald hafi verið kærð til Landsréttar. Aðspurður hvernig hinir grunuðu komust að veikleikanum segir Stefán verknaðaraðferðina enn til rannsóknar. Rannsóknin sé flókin og þá sérstaklega rakning fjármuna sem verði töluvert flókin. Færst hefur í aukana að einstaklingar nýti sér rafmyntir til að koma illa fengnu fé undan. 

„Öryggismál eru efst í forgangsröðinni hjá okkur og við leggjum mikið upp úr því að koma í veg fyrir að hægt sé að misnota kerfin. Í þessu tilfelli náðist með illum ásetningi að misnota þetta tímabundna ástand í kerfinu sem varð til við uppfærslu. Þetta er enn og aftur áminning um mikilvægi öryggismála sem eru í stöðugri endurskoðun og endurmati hjá okkur.“

Málið sé komið í viðeigandi farveg en tekið er fram að viðskiptavinir bankanna hafi ekki orðið fyrir tjóni vegna málsins.

Frétt uppfærð 18:04 með svörum frá Íslandsbanka.