Salah sendi Egypta á HM

Salah hefur að sjálfsögðu verið allt í öllu hjá Egyptum í undankeppninni og hann skoraði tvö markanna í dag, þegar farseðillinn til Ameríku næsta sumar var tryggður. Fyrra markið var hnitmiðað pot á nærstöng en seinna markið glæsileg vippa yfir markvörð heimamanna.

Ibrahim Adel hafði komið Egyptum yfir á áttundu mínútu leiksins.

Egyptar eru nú með fimm stiga forskot á Búrkína Fasó á toppi A-riðils, þegar aðeins ein umferð er eftir, og fara beint á HM. Búrkína Fasó gæti hins vegar komist í umspil.

Egyptaland er þriðja Afríkuþjóðin sem tryggir sig inn á HM, á eftir Marokkó og Túnis.