Miklar tafir á fjölda flug­valla vegna netárásar

Í tilkynningu frá fulltrúum flugvallarins í Brussel í Belgíu segir að netárásin hafi átt sér stað að kvöldi til þann 19. september. Árásin var gerð á kerfi Collins Aerospace, sem sér um innritunar- og brottfarakerfi fjölda flugfélaga. 

Um sama vandamál er að ræða á Brandenburg-flugvellinum í Berlín og Heathrow-flugvelli í Lundúnum, sá síðarnefndi er einn fjölfarnasti flugvöllur heimsálfunnar. Í Lundúnum er verið að innrita alla farþega handvirkt samkvæmt tilkynningu. Í Brussel er búist við að netárásin hafi mikil áhrif á flugferðir.

„Við erum að vinna í því að leysa málið og endurheimta fulla virkni kerfisins fyrir viðskiptavini okkar eins hratt og hægt er,“ segir í tilkynningu frá Collins Aerospace samkvæmt AP.

„Áhrifin eru takmörkuð við rafræna innritun viðskiptavina og farangursafhendingu og hægt er að draga úr áhrifunum með því að innrita farþega handvirkt.“