Mann­skæð skot­á­rás í skóla í Banda­ríkjunum

Þetta er að minnsta kosti fjórða mannskæða skotárásin í borginni á einum sólarhring. Einn lét lífið og sex særðust í árás fyrir utan annan skóla í gær og tveir aðrir létu svo lífið í tveimur mismunandi árásum seinna í gær.

Árásin átti sér stað við kirkju á skólalóðinni, þar sem börn höfðu komið saman í messu í upphafi skóladags. Héraðsmiðillinn Star Tribune segir tíu ára dreng hafa hlotið skotsár á höfði.

Þetta heyrðist víst í samskiptum milli viðbragðsaðila og sögðu þeir einnig að „fórnarlömbin“ væru að minnsta kosti tuttugu talsins. Tvö þeirra voru sögð hafa verið skotin í höfuðið og að minnsta kosti einn til viðbótar mun hafa verið í alvalegu ásigkomulagi.

Þá segir AP fréttaveitan að fimm börn hafi verið flutt á sjúkrahús eftir árásina.

Star Tribune hefur eftir íbúum nærri skólanum að skothríðin hafi staðið yfir í nokkurn tíma.

Faðir eins skólabarns sem býr nærri skólanum og sagðist þekka til skotvopna sagði skothríðina hafa hljómað eins og árásarmaðurinn hafi notað hálf sjálfvirkan riffil. Skothríðin hafi staðið yfir í nokkrar mínútur og telur faðirinn sig hafa heyrt þrjátíu til fimmtíu skot.

Fréttin verður uppfærð.

Hér að neðan má sjá beina útsendingu AP frá skólanum.