Að­eins sjö lið í heiminum eytt meira en ný­liðar Sunderland

Sunderland endaði í 4. sæti ensku B-deildarinnar á síðustu leiktíð með 76 stig. Það er heilum 14 stigum á eftir Sheffield United sem endaði sæti ofar og 24 stigum minna en toppliðin tvö, Leeds United og Burnley.

Sem betur fer fyrir Sunderland fara liðin í 3. til 6. sæti í umspil um sæti í úrvalsdeildinni og þar hafði Sunderland betur gegn Sheffield.

Stigafjöldi Sunderland á síðustu leiktíð gefur til kynna að leikmannahópur liðsins hafi engan veginn verið klár fyrir átök úrvalsdeildarinnar. Því var ákveðið að spýta í lófana og galopna veskið. 

Hver leikmaðurinn á fætur öðrum hefur verið keyptur og það fyrir himinháar upphæðir. Áhugaverðasta nafnið er eflaust hinn þveri Granit Xhaka en hann er þó langt í frá að vera dýrastur.

1. Habib Diarra frá Strasbourg – 31.5 milljón evra
2. Simon Adingra frá Brighton & Hove Albion – 24.4 milljónir evra
3. Enzo Le Fée frá Roma – 23 milljónir evra
4. Chemsdine Talbi frá Club Brugge – 20 milljónir evra
5. Noah Sadiki frá Union SG – 17 milljónir evra
6. Granit Xhaka frá Bayer Leverkusen – 15 milljónir evra
7. Robin Roefs frá NEC Nijmegen – 10.5 milljónir evra
8. Reinildo Mandava frá Atlético Madríd – Á frjálsri sölu
9. Marc Guiu á láni frá Chelsea

Þegar kemur að eyðslu í sumarglugganum eru aðeins sjö lið í heiminum sem hafa eytt meiri pening en Sunderland. Þar af eru „sex stóru í ensku úrvalsdeildinni.“

Í myndbandinu hér að ofan er farið yfir hvernig Sunderland hefur efni á þessu. Vissulega fylgja því miklir peningar að komast upp í úrvalsdeildina. Það hjálpar hins vegar að liðið sem fór upp var einkar ódýrt og því hafði félagið enn meira á milli handanna heldur en ella þegar glugginn opnaði.

Nú er bara að bíða og sjá hvort þetta dugi til að halda Sunderland í deild þeirra bestu.

Svörtu kettirnir taka á móti Hömrunum 1. umferð úrvalsdeildarinnar þann 16. ágúst næstkomandi. Allir 380 leikir deildarinnar verða sýndir beint á Sýn Sport.

Hér má tryggja sér áskrift.