Félix sá fjórði dýrasti saman­lagt

Sádi-arabíska félagið Al-Nassr borgar Chelsea 43,7 milljónir punda fyrir fá enska úrvalsdeildarfélagið alla bónusana.

Það hefur aðeins verið borgað meira fyrir þrjá aðra knattspyrnumenn í sögunni samanlagt þegar öll kaupin á þeim eru lögð saman.

Brasilíumaðurinn Neymar er efstur en félög hafa alls eytt 346 milljónum punda í hann.

Það er 26 milljónum meira en í Belgann Romelu Lukaku sem hefur alls kostað sín félög 320 milljónir punda.

Það er langt niður í Cristiano Ronaldo í þriðja sætinu en hann er sá eini sem er fyrir ofan Joao Felix. Felix er nú kominn upp fyrir menn eins og Ousmane Dmebélé, Álvaro Morata og Antoine Griezmann.

Felix er enn bara 25 ára gamall og gæti því verið seldur fyrir meiri pening í framtíðinni. Tuttugu milljón punda sala myndi koma honum upp fyrir landa sinn Cristiano Ronaldo.

Chelsea keypti hann frá Atlético Madrid fyrir 42 milljónir punda og Atlético Madrid keypti hann frá Benfica fyrir risaupphæð eða 113 milljónir punda. Hann hefur síðan farið á láni til annara félaga á síðustu árum.

Felix hefur vissulega sýnt flott tilþrif inn á milli sem fékk þessi félög til að fjárfesta í honum en skortur á stöðugleika hefur verið stórt lýti á hans leik. Nú er hann kominn til Sádi Arabíu og óvíst að hann snúi aftur til Evrópu á sínum ferli.