Viður­kennir að prumpið sem heyrðist um allan heim sé hans

Scheffler spilaði frábærlega á síðasta risamóti ársins og vann með nokkrum yfirburðum. Hann sá til þess að það var aldrei mikil spenna á lokadeginum.

Þetta er annað risamótið sem Scottie Scheffler vinnur á árinu og það fjórða á ferlinum. Hann er langefstur á bæði tekjulistanum og á heimslistanum.

Ein vinsælasta klippan með honum frá opna mótinu fór á mikið flug á netinu og þá mátti alls ekki slökkva á hljóðinu.

Scheffler var að slá í beinni útsendingu og sló ágætis högg sem fór næstum því í holu. Eftir að hann sló þá heyrðist eitt langt og hátt prump sem hljóðnemarnir náðu vel. Lýsendurnir fóru báðu að skellihlæja og sögðu meðal annars: „Það er svo mikið hægt að segja um þetta högg.“

Var þetta áhorfandi, lýsendurnir sjálfir eða hvaða kom þetta prump?

Scheffler sjálfur var hins vegar ekkert að fela sig eða sín búkhljóð.

„Já þetta var ég. Ó já þetta var ég. Ég meina, þú ert út á golfvellinum í sex klukkutíma og þú ert líka að borða öðruvísi mat þarna. Þá geta svona hlutir gerst,“ sagði Scottie Scheffler í viðtali í Pardon My Take þættinum.

Scheffler er ekki aðeins að ná Tiger Woods hæðum í golfinu heldur hefur hann einnig húmor fyrir sjálfum sér.

Það sést sem dæmi í nýju Happy Gilmore myndinni þar sem hann er leiddur í burtu í handjárnum. „Ekki aftur,“ heyrist í Scheffler í myndbrotinu sem hefur verið notað til að auglýsa myndina. Mikla athygli vakti þegar hann var handtekinn fyrir utan golfvöllinn í miðju PGA meistaramótinu árið 2024 eftir að hafa lent upp á kant við lögreglumann.

Scheffler var líka á mannlegum nótunum á blaðamannafundi fyrir Opna meistaramótið þar sem hann talaði um lífsfyllinguna og að hver sigur hans á golfvellinum skilaði ekki miklu á þeim vettvangi. Mikil gleði í nokkrar mínútur og svo væri það búið.

Það er þessi mannlegi þáttur í beinum tengslum við stórkostlega spilamennsku Scheffler sem mun aðeins gera hann enn stærri og enn vinsælli í golfheiminum.

Hvað er þá eitt hátt prump í miðri útsendingu á milli manna.