Banda­ríkja­for­seti birtir bull í bunkum

Tulsi Gabbard, yfirmaður leyniþjónustustofnana Bandaríkjanna, gaf út skjal í síðustu viku, þar sem hún sakar Obama og samstarfsmenn hans um samsæri með því að komast að þeirri niðurstöðu að Rússar hefðu haft afskipti af forsetakosningunum vestanhafs og freistað þess að aðstoða Trump.

Skrifstofa Barack Obama sendi út yfirlýsingu þar sem hún fordæmdi harðlega niðurstöðu Gabbard og yfirlýsingar Trump um málið. Ekkert í skjalinu afsannaði þá niðurstöðu að Rússar hefðu freistað þess að hafa áhrif á kosningarnar. Einnig var bent á að þverpólitísk þingnefnd, sem þá var leidd af Marco Rubio, núverandi utanríkisráðherra, hefði samþykkt niðurstöðurnar árið 2020.

Trump sagði í vikunni að hefja þyrfti sakamálarannsókn gegn Obama vegna valdaránstilraunar. „Hann er sekur. Þetta voru landráð. Þetta var allt sem þú getur ímyndað þér. Þeir reyndu að stela kosningunum. Þeir reyndu að þvæla kosningarnar. Þeir gerðu hluti sem enginn hefði getað ímyndað sér,“ sagði hann.

Obama hundeltur og handtekinn

Á sama tíma hefur Trump verið afar ötull við að grínast með handtöku Obama á samfélagsmiðli sínum, Truth Social, með ýmiss konar meme-um og myndböndum. 

Fyrir sléttri viku, þann 20. júlí, endurbirti Trump langt gervigreindarmyndband þar sem Obama er handtekinn í forsetaskrifstofu Hvíta hússins og síðan færður bak við lás og slá. Myndbandinu hefur síðan þá verið eytt af Truth Social en enn er hægt að finna það annars staðar á netinu og myndir upp úr því.

Rétt fyrir miðnætti sama dag deildi Trump gervigreindarmynd sem var titluð „The Shady Bunch“ (sem er grínafbrigði af The Brady Bunch) eða „Skuggalega liðið“.

Á myndinni má sjá átta manneskjur í fangaklæðum stilla sér upp fyrir týpíska fangamynd. Fólkið sem um ræðir eru Obama og nokkrir af hans undirmönnum. 

Þar á meðal fyrrverandi sendiherrarnir Samantha Power og Susan Rice; Valerie Jarrett, ráðgjafi; James Clapper, fyrverandi forstjóri leyniþjónustustofnana Bandaríkjanna; James Comey, fyrrverandi forstjóri FBI; John Brennan, fyrrverandi forstjóri CIA og Ben Rhodes, fyrrverandi starfsmaður, sem búið er að gefa viðurnefnið „Hamas“.

Myndin er augljóst grín en líka hluti af þessari áframhaldandi herferð Trump um að Obama og undirmenn hans hafi framið landráð og það þurfi að handtaka þau fyrir það.

Nýjasta grínið þessu tengt birti Trump í gær en það er mynd af bílaeltingarleik OJ Simpson og lögreglunnar árið 1994. Myndinni hefur verið breytt þannig að í hvíta Bronco-num er Obama og í næstu lögreglubílum á eftir honum eru JD Vance og Trump.

Athygli vekur að myndin sem er notuð af Vance er sams konar og grínmyndirnar af varaforsetanum sem fóru í mikla dreifingu fyrr á árinu. Á þeim myndum var búið að afskræma og blása upp andlit Vance.

Löng saga af gervigreindardreifingu

Gervimyndadreifing Trump og undirmanna hans teygir sig þó lengra aftur. Eftir að hafa afnumið umferðargjald í Manhattan í febrúar titlaði hann sjálfan sig sem konung og deildi samfélagsmiðlaaðgangur Hvíta hússins svo mynd af forsetanum með kórónu.

Sjá einnig: Trump titlar sig konung

Samfélagsmiðlateymi Hvíta hússins hefur birt fleiri sambærilegar falsmyndir af Trump, annars vegar í gervi jedi-riddara og hins vegar Ofurmennisins. Í kringum andlát Frans páfa þá deildi Trump mynd af sér í páfaskrúða og sagðist vel geta ímyndað sér sig í hlutverkinu.

Þá eru ótaldar alls konar aðrar færslur Trump og félaga: ICE-krókódílar, grátandi Demókratar og rívíeran sem Trump vill byggja á Gasaströndinni.

En af hverju hagar Trump sér svona? Hvers vegna er hann að dreifa fölsku gervigreindarsulli, sull-pósta ef við íslenskum enska hugtakið slop-posting?

„Ástæðan fyrir því að Trump dreifir mikið af gervigreindarefni er sama ástæðan og mörg hægrisinnuð tröll dreifa efninu: til að stuðla að ,meme-þróun' stjórnmálanna,“ segir Alex Mahadevan, forstjóri MediaWise sem er deild hjá Poynter-stofnuninni í Flórída sem sérhæfir sig í gagnalæsi stafræns efnis.

Með gervigreindarefninu nái Hvíta húsið að sækja smelli og viðhalda sér í umræðunni. Og það virðist virka vel.

Nýverið fékk Trump þó sjálfur að kenna á gervigreindargríni þegar höfundar South Park tileinkuðu fyrsta þátt 27. seríu Bandaríkjaforsetanum og sýndu mínútulangt djúpfölsunarmyndband af Trump á typpinu.