Fékk út­rás fyrir keppnisskapið við heimilis­störfin

Pablo sleit krossband í ágúst í fyrra og hafði því verið frá vellinum í nærri tólf mánuði þegar hann sneri aftur í júlí. Hann lagði meðal annars upp mark í mögnuðum 8-0 sigri Víkings á Malisheva frá Kosovo í vikunni.

„Þetta var rosa gaman. Mér leið eins og ég væri að spila minn fyrsta leik aftur. Þetta var ógeðslega gaman. Mér líður rosalega vel, ég hef unnið mikið í þessu en við vorum heppnir með þetta líka. Ég hef ekki fundið neitt síðan ég fór í aðgerð. Ekkert bakslag, enginn verkur, engar bólgur og ekki neitt,“ segir Pablo.

Erfitt þegar hægði á batanum

Þó að endurhæfing hafi að mörgu leyti gengið vonum framar var erfitt fyrir El Salvadorann að vera svo lengi utan vallar.

„Fyrstu mánuðirnir voru fínir. Þá var mikið að gerast og hratt að gerast en svo mánuðir 5, 6 til 9, 10 voru erfiðastir. Það var mjög erfitt. Fjölskyldan fann aðeins fyrir því. En ég er heppinn að eiga svona geggjaða konu sem hjálpaði mér mikið í gegnum þetta,“ segir Pablo sem segir mikið hafa reynt á andlegu hliðina.

„Þetta er erfitt andlega. Þessi skref sem þú þarft að fara í gegnum. Þeir sem hafa upplifað þetta þekkja þetta. Þetta er mjög erfitt.“

Snúa þurfti keppnisskapinu annað, jafnvel í heimilsstörfin.

„Ég er keppnismaður og langar alltaf að keppa. Þegar ég er ekki með outlet fyrir það, er það erfitt. Ég þarf að fá útrás fyrir keppninni að minnsta kosti einu sinni í viku. Svo eftir það get ég verið rólegur pabbi heima, ég þarf að leyfa þessum Pablo að komast út,“

„Ég gat ekki spilað golf, gat ekki gert mikið líkamlega. Þannig að ég þurfti að hugsa: Get ég gengið hraðar frá þvottinum? Eða komið börnunum mínum hraðar að sofa? En þetta var bara áskorun,“

Ekki í myndinni að hætta

Í viðtali við Sýn eftir meiðslin í fyrra greindi Pablo frá vangaveltum um hvort ferli hans væri hreinlega lokið. Þær vangaveltur eru löngu gleymdar í dag.

„Ég tók mér tíma eftir að ég meiddist að finna út úr því hvort ég vildi gera þetta. Og spurði af hverju ég væri að spila. Svo langaði mig bara að gera þetta. Mér finnst ennþá rosa gaman að mæta, að æfa og bæta mig og gaman að keppa. Á meðan ég get þetta, þá geri ég þetta,“ segir Pablo.

Viðtalið má sjá í spilaranum.