Dæmdur ofbeldismaður keppir á Opna breska í ár

Þetta er fjórða og síðasta risamót ársins en Mastermótið fór fram í apríl, PGA meistaramótið í maí og Opna bandaríska meistaramótið í júní.

Meðal keppenda er dæmdur ofbeldismaður sem var hluti af hjólaglæpagengi þegar hann var ungur maður.

Ástralinn Ryan Peake á þessu mjög sérstöku fortíð fyrir atvinnukylfing.

Hann tryggði sér þátttökurétt á Opna breska í ár með því að vinna Opna nýsjálenska mótið í mars.

Peake var mjög efnilegur kylfingur frá Perth í Ástralíu sem gerist atvinnumaður nítján ára gamall. Tveimur árum seinna var hann kominn í rugl, lítið gekk í golfinu og hann gerðist 21 árs gamall meðlimur í mótorhjólagenginu Rebels.

Hafði áhuga á þessum heimi

„Þaðan sem ég kem var ekkert óvenjulegt að hanga með slíkum hópum og vera þar með vinum sínum. Ég naut þess og hafði áhuga á þessum heimi. Ég fann þar eitthvað sem ég fann hvergi annars staðar,“ sagði Ryan Peake, þegar BBC spurði hann um hvernig efnilegur kylfingur endar í slíkum félagsskap.

Mótorhjólið var áhugamál hjá Peake en það endaði ekki vel. Hann endaði á því að fá fimm ára fangelsis dóm fyrir líkamsárás. Hann segir að sá hinn sama hafi verið að hóta honum og félögum hans.

Hann hafði hótað okkur

„Við fórum bara til að taka á því en ef ég er hreinskilinn þá átti þetta að sjálfsögðu ekki að enda svona,“ sagði Peake.

„Við ætluðum bara að ræða við viðkomandi og gefa honum nokkur högg í leiðinni. Hann hafði hótað okkur og var síðan vopnaður og allt fór á versta veg,“ sagði Peake.

Peake nýtti tímann í fangelsinu í endurhæfingu og fékk hjálp frá reyndum áströlskum þjálfara, Ritchie Smith.

Ritchie Smith trúði því að Peake ætti möguleika á því að koma sér aftur inn í golfið.

„Hann þjálfar menn sem vinna risamót. Hann þjálfara þá bestu í heimi. Hann mun ekki eyða tíma í einhvern sem hann hefur ekki trú á. Það fékk mig til að trú því að þetta væri hægt,“ sagði Peake.

Þetta er bara ég

„Ég lét vaða en átti auðvitað ekki von á því að ég kæmist svona langt. Nú vil ég komast enn lengra,“ sagði Peake.

Hann varð aftur atvinnumaður árið 2022 en stærsta stundin var síðan í mars þegar hann vann Opna nýsjálenska meistaramótið.

Árangur hans vakti líka athygli á fortíðinni og Peake ákvað að vera alveg hreinskilinn með hana.

„Þetta er bara ég. Ég komst líka út úr mótorhjólagenginu með því að vera hreinskilinn. Svona er bara mín saga og ég skammast mín ekkert fyrir hana. Þetta er eitthvað sem ég gerði og ég hef tekið út mína refsingu,“ sagði Peake.