Um­breyta Þjóð­leik­hús­kjallaranum í kabarettklúbbinn Kit Kat

Leikhús ókunnuga fólksins er nýtt leikfélag sem hefur það að markmiði að framleiða vandaðar sviðslistir og bjóða upp á ný og spennandi tækifæri fyrir metnaðarfullt listafólk, að eigin sögn, og leggur áherslu á að gera söngleikjaforminu hátt undir höfði.

„Við trúum því að leikhúsið sé staður þar sem ókunnugt fólk úr ólíkum áttum kemur saman með það fyrir augum að tengjast í gegnum sköpun. Þess vegna heitum við Leikhús ókunnuga fólksins,“ segir í fréttatilkynningu frá félaginu.

Halda opnar prufur

Hinir ókunnugu ætla að færa upp hinn sígilda og vinsæla söngleik Kabarett eftir Masteroff, Ebb og Kander í íslenskri þýðingu Karls Ágústs Úlfssonar. Sýningin verður frumsýnd í Þjóðleikhúskjallaranum í mars á næsta ári. Bjartur Örn Bachmann leikstýrir verkinu en hann hefur að sögn aðstandenda vakið athygli á undanförnum árum fyrir nálgun sína á söngleikinn.

Eins og áður segir stendur félagið fyrir opnum prufum í næsta mánuði eða nánar tiltekið dagana áttunda, tíunda og fjórtánda júlí. Umsóknarfrestur er til 25. júní og fer skráning fram á heimasíðu félagsins. Nánari upplýsingar um prufurnar má finna með því að smella hér.

Aðstandendur Leikhúss ókunnuga fólksins eru þau Bjartur Örn Bachmann, sem leikstýrir sýningunni, Helena Hafsteinsdóttir framleiðslustjóri, Arndís María Ólafsdóttir aðstoðarleikstjóri, Níels Thibaud Girerd dramatúrg, Júlía Kolbrún Sigurðardóttir hreyfihönnuður og Katrín Anna Karlsdóttir markaðsstjóri.

Með sér í lið hafi þau fengið einvala lið listamanna sem öll brenna fyrir söngleiknum. Sally Cowdin er danshöfundur sýningarinnar, Fannar Sigurðsson og Þorsteinn Jónsson annast tónlistarstjórn, Hulda Kristín Hauksdóttir fatahönnuður sér um búninga, vöruhönnuðurinn Bryndís Magnúsdóttir og myndlistarmaðurinn Melanie Ubaldo sjá um leikmynd og leikmuni, athafnakonan Kristjana Rós Sigurðardóttir sér um leikgervi, Jóhann Friðrik Ágústsson sér um lýsingu og Þórður Gunnar Þorvaldsson um hljóðhönnun.

Sígildur söngleikur með skilaboð til nútímans

Söngleikinn Kabarett þarf vart að kynna fyrir leikhúsunnendum en hann var frumsýndur á Broadway árið 1966 og öðlaðist fljótt sess í söngleikjakanónunni. Síðar kom út kvikmyndin Cabaret undir leikstjórn Bob Fosse sem sló í gegn og skaut Lizu Minelli, í hlutverki Sally Bowles, rakleitt upp á stjörnuhiminn.

Í tilkynningu frá félaginu segir að verkið fjalli á ögrandi hátt um samfélag á heljarþröm.

„Það býður áhorfendum í tímaferðalag tæplega 100 ár aftur í tímann inn á stórfjörugan en afar kynlegan skemmtistað í Berlín. Í næturhúminu blómstra ástin, frelsið og listin en samtímis eykst ógn nasismans yrir utan veggi klúbbsins dag frá degi. Sýningin fæst á djarfan og ærslafullan hátt við eðli illskunar.“

Á sýningarkvöldum fái áhorfendur tækifæri til að stíga inn í söguheim verksins en Kjallaranum verður umbreytt í kabarettklúbbinn Kit Kat.

„Sköpunin mun svífa yfir vötnum í Söngleiknum Kabarett næsta vor. Við viljum bjóða áhorfendum upp á ógleymanlega upplifun frá því að þeir stíga fæti inn í leikhúsið. Þetta er ekki þáttökusýning en við komum til með að leika á barnum, í salnum og auðvitað á sviðinu,“ segir Bjartur Örn leikstjóri.

Klikkað, bráðskemmtilegt og skelfilegt verk

Hann segir verkið fjalla um samfélag þar sem óttinn er allsráðandi. Kabarettklúbburinn sé skjól frá hinu róstursama Þýskalandi uppgangsára nasistanna.

„Þar inni er lífið gullfallegt eins og skemmtanastjórinn segir og áhyggjurnar skildar eftir fyrir utan. Verkið fjallar um fólk á flótta frá raunveruleikanum og svona flýtur hálfsofandi að feygðarósi. Ástin er í forgrunni en óttinn er aldrei langt undan. Mér finnst sérstaklega áhugavert hvaða linsu höfundar verksins velja að setja á aðdragandann að seinni heimstyrjöldinni og í hvernig ástandi var hægt að leggja grunn að skelfilegasta tímabili mannkynssögunnar. Þetta er ótrúlegur tilfinningaheimur sem verkið býður upp á og tónlistin, sem er mögnuð, fangar hann vel. Þetta er klikkað verk sem nær samtímis að vera bráðskemmtilegt og skelfilegt. Við erum ótrúlega spennt,“ segir Bjartur