Her­menn bauluðu á Biden, Newsom og blaða­menn

Ræðan átti formlega að vera um 250 ára afmæli bandaríska hersins en ræðan var mjög pólitísks eðlis og Trump varði miklu púðri í að gagnrýna Joe Biden, forvera hans, tala um ástandið í Los Angeles og varpa fram lygum um kosningarnar 2020 og ýmislegt annað.

Nokkuð stór hluti ræðu Trumps sneri að ástandinu í Los Angeles en þangað hefur hann sent þjóðvarðliða og landgönguliða til að aðstoða útsendara Innflytjendastofnunar Bandaríkjanna (ICE) við að handsama fólk sem dvelur ólöglega í Bandaríkjunum og kveða niður mótmæli gegn þeim aðgerðum.

Hermennina sendi hann til borgarinnar í óþökk ráðamanna í Los Angeles og í Kaliforníu sem hafa sakað forsetann um óþarfa stigmögnun.

Sjá einnig: „Stundin sem við höfum óttast er runnin upp“

Í ræðu sinni kallaði Trump mótmælendur í Los Angeles „dýr“ og „erlenda óvini“. Hann sagði einnig að ef hann hefði ekki sent þjóðvarðliða til Los Angeles stæði borgin í ljósum logum. Húsin þar væru að brenna, eins og þau hefðu gert fyrir nokkrum mánuðum síðan.

Varpaði hann hluta sakarinnar á alþjóðleg glæpasamtök og sagði að stjórnleysi hvað varðaði innflytjendamál leiddi til hræðilegrar óreiðu og eyðileggingar.

„Og vitið þið hvað, þetta er svona í Evrópu líka. Þetta er að gerast í mörgum löndum Evrópu,“ sagði Trump. „Þeim er illa við það þegar ég segi það en ég skal segja það hátt og skýrt. Þeim er best að gera eitthvað áður en það verður of seint.“

Sjá má valda hluta úr ræðu Trumps, hluta sem snúa að Los Angeles, í spilaranum hér að neðan.

Áhugasamir geta horft á alla ræðuna hér.

Bauluðu á Biden, Newsom og blaðamenn

Í ræðu sinni talaði Trump um að ríkisstjórn Bidens hefði breytt nafni Fort Bragg í Fort Liberty árið 2023 en því var fljótt breytt aftur af ríkisstjórn Trumps.

„Trúið þið því að síðasta ríkisstjórn hafi breytt nafninu í smá stund?“ spurði Trump svo hermenn bauluðu. Síðar stærði Trump sig af því að Biden hefði ekki getað laðað jafn marga áhorfendur á ræðu og hann gerði.

Aftur bauluðu hermenn.

Þá bauluðu hermenn aftur þegar Trump nefndi Gavin Newsom, ríkisstjóra Kaliforníu, og Karen Bass, borgarstjóra Los Angeles, og sagði þau vanhæf. Hann sagði þau reyna að standa í vegi laganna og aðstoða glæpsamlega innrásaraðila við að hernema Los Angeles.

Einnig var baulað þegar Trump talaði um hina „fölsku fjölmiðla“ sem voru að fylgjast með og sjónvarpa ræðu hans. Það er eitthvað sem hann hefur ítrekað gert á kosningafundum sínum í gegnum árin.

Bandarískum hermönnum er samkvæmt reglum varnarmálaráðuneytisins bannað að taka þátt í pólitísku starfi.

Trump hélt því einnig fram í ræðu sinni að hann hefði sent þjóðvarðliða til Minneapolis árið 2020, til að kveða niður óeirðir í kjölfar morðsins á George Floyd, sem myrtur var af lögregluþjóni.

Hann sagðist aldrei gleyma því að borgin hafi staðið í ljósum lögum og sagði að Tim Waltz, ríkisstjóri Minnesota, hefði neitað að senda þjóðvarðliðið á vettvang.

„Ég beið svo lengi og ég kallaði á þjóðvarðliðið og ég bjargaði borginni,“ sagði Trump.

Eins og bent er á í frétt CNN er það ekki satt hjá forsetanum. Walz sendi þjóðvarðlið Minnesota á vettvang rúmum sjö klukkustundum áður en Trump stakk fyrst upp á því. Þó Walz hafi verið gagnrýndur fyrir hægagang er ljóst að hann sendi þjóðvarðliðið en ekki Trump.

Í ræðunni laug Trump því einnig að svindlað hefði verið á honum í forsetakosningunum 2020.

Mótmælendum skrúðgöngu mætt af miklu afli

Til stendur að halda mótmæli víða um Bandaríkin næstu helgi undir nafninu „No Kings Day“ eða „Enginn konungsdagur“. Er það vegna skrúðgöngu hersins sem haldin verður í Washington DC á laugardaginn. Formleg ástæða skrúðgöngunnar er 250 ára afmæli hersins en Trump sjálfur verður 79 ára á laugardaginn.

Á fyrsta kjörtímabili Trumps heimsótti hann Frakkland þar þegar haldið var upp á Bastilludaginn og sá hann þar hersýningu, sem hann var sagður mjög hrifinn af. Í kjölfarið fór hann fram á að slík sýning yrði einnig haldin í Bandaríkjunum en engin hefð er fyrir slíku þar.

Sjá einnig: Trump vill hersýningu eins og Frakkar

Trump er ekki sáttur við fregnir af mótmælum um helgina. Hann sagði blaðamönnum í gær að ef skrúðgöngunni yrði mótmælt yrði mótmælendum mætt af „mjög miklu afli“, hvort sem þeir væru friðsamir eða ekki.

„Ég hef ekki einu sinni heyrt af mótmælum en þú veist, þetta er fólk sem hatar landið okkar. En þeim verður mætt af mjög miklu afli.“

Breyta nöfnum herstöðva aftur

Trump tilkynnti einnig í ræðu sinni í gær að hann ætlaði að breyta nöfnum herstöðva, sem breytt var árið 2003, aftur í upprunalegu nöfn þeirra. Herstöðvarnar munu því aftur bera nöfn leiðtoga Suðurríkjasambandsins úr bandarísku borgarastyrjöldinni.

Forsvarsmenn herafla Bandaríkjanna tilkynntu svo í kjölfarið að um væri að ræða sjö herstöðvar. Það eru Fort A.P. Hill, Fort Pickett, Fort Robert E. Lee, Fort Gordon, Fort Hood, Fort Polk og Fort Rucker.

Þetta er í kjölfar þess að Pete Hegseth, varnarmálaráðherra, tilkynnti í mars að Fort Moore yrði aftur nefnt Fort Benning.

Herinn segir að í rauninni sé ekki verið að nefna herstöðvarnar aftur eftir leiðtogum uppreisnarinnar í suðri, heldur hafa forsvarsmenn hersins fundið alnafna þeirra leiðtoga sem þjónuðu einnig í bandaríska hernum, eða nokkra hermenn með sömu upphafsstafi, og eiga herstöðvarnar að vera nefndar í höfuðið á þeim, samkvæmt AP fréttaveitunni.

Sem dæmi, þá hét Fort A.P. Hill upprunalega eftir herforingjanum Ambrose P. Hill en árið 2023 var nafninu breytt í Fort Walker. Var það tilvísun í Mary Edwards Walker, lækni sem hlúði að hermönnum í borgarstyrjöldinni og fékk Heiðursorðuna (e. Medal of honor) fyrir þau störf sín.

Til að breyta nafninu aftur í Fort A.P. Hill er herstöðin nú sögð vera nefnd eftir þremur hermönnum úr borgarastyrjöldinni, þeim Edward Hill, Robert A. Pinn og Bruce Anderson.