Kláraði læknis­fræði og keppti á HM í sömu viku

Kristrún skrifaði brosmild undir læknaeiðinn í síðustu viku og mun um helgina útskrifast frá Háskóla Íslands eftir sex ára nám.

Í millitíðinni skellti hún sér svo til Chemnitz í Þýskalandi og reið á vaðið fyrir hönd íslenska hópsins sem mættur er á HM í klassískum kraftlyftingum.

Kristrún keppti í -52 kg flokki og lyfti samtals 357,5 kg sem skilaði henni 17. sæti.

Hún lyfti 132,5 kg í hnébeygju og 80 kg í bekkpressu, þar sem hún var einungis hálfu kílói frá Íslandsmeti sínu. Hún lyfti svo 145 kg í réttstöðulyftu og reyndi einnig við 152,5 kg sem er Íslandsmet hennar frá því á EM í fyrra. Sú lyfta var þó dæmd ógild vegna tæknivillu.

Í hnébeygjunni byrjaði Kristrún á að lyfta 117,5 kg, næsta auðveldlega, og lyfti einnig 127,5 kg örugglega upp. Lokalyftan var svo 132,5 kg eins og fyrr segir en það er 3 kg frá Íslandsmeti hennar.

Í bekkpressunni lyfti Kristrún fyrst 72,5 kg, svo 77,5 og að lokum 80 kg.

Í réttstöðulyftunni byrjaði Kristrún svo á öruggum 135 kg áður en hún hækkaði um 10 kg eins og fyrr segir og lyfti 145 kg af öryggi.

Glæsilegur árangur hjá Kristrúnu sem hefur ærna ástæðu til að fagna á laugardaginn þegar hún útskrifast svo formlega sem læknir.