Bjart og milt peysuveður

Þetta kemur fram í hugleiðingum veðurfræðings á vef Veðurstofunnar.

Veðurstofan segir útlit fyrir fremur hæga norðlæga átt. Búast megi áfram við lítilsháttar rigningu eða slyddu norðaustan- og austanlands, en þar dregur úr úrkomu þegar líður á daginn. Bjart með köflum sunnan- og vestantil, en skúrir á víð og dreif. 

Hiti verður á bilinu fjögur til tólf stig, svalast á Norðausturlandi en mildast á Suðurlandi.

„Á miðvikudag gengur í austan strekking eða allhvassan vind syðst á landinu, annars hægari. Þá þykknar upp sunnan heiða og dálítil rigning með köflum síðdegis, en lengst af bjart fyrir norðan. Hlýnar heldur,“ segir í hugleiðingum veðurfræðings.

Veðurhorfur á landinu næstu daga

Á þriðjudag: Austlæg eða breytileg átt, 3-10 m/s og dálitlar skúrir sunnan- og austanlands, en bjartviðri á Norðvesturlandi. Hiti fimm til fjórtán stig, hlýjast vestantil.

Á miðvikudag: Austan 10-15 m/s syðst á landinu, annars hægari vindur. Lengst af bjart fyrir norðan, en skýjað og fer að rigna sunnan heiða seinnipartinn. Hlýnar heldur.

Á fimmtudag: Norðvestlæg eða breytileg átt, 3-10 og dálítil væta með köflum, en léttir víða til síðdegis. Hiti sjö til sautján stig, mildast syðst.

Á föstudag: Hæg breytileg átt og bjart með köflum, en þokuloft við suðaustur- og austurströndina. Áfram milt.

Á laugardag og sunnudag: Útlit fyrir norðaustlæga átt og víða bjart, en skýjað með köflum suðaustantil og lítilsháttar væta. Hiti sjö til sautján stig, hlýjast vestanlands.