Reon ræður inn hönnunarstjóra frá Spotify

Í fréttatilkynningu segir að Orri komi til Reon frá Spotify, þar sem hann starfaði sem hönnuður. Hann býr yfir áratugs reynslu af stafrænum hönnunarmálum og hefur áður unnið fyrir og með fyrirtækjum á borð við Verna, IKEA, Marel og Nespresso, svo fátt eitt sé nefnt.

„Við erum himinlifandi að fá Orra í teymið. Hönnun er lykilþáttur í þróun og árangri stafrænna lausna og grundvöllur þess að skapa traust og tengsl við notendur. Orri býr yfir mikilli reynslu og einstökum hæfileikum til að sameina nýsköpun við notendavæna nálgun, og við hlökkum til að fá hann með í næstu skref fyrirtækisins,“ er haft eftir Rósu Dögg Ægisdóttur, framkvæmdastjóra Reon.

Þá segir að ráðning Orra marki mikilvægt skref í uppbyggingu teymis Reon, sem hafi á undanförnum misserum stækkað verulega með fjölbreyttum ráðningum á sviðum markaðs, sölu og vöruþróunar. 

„Það er fátt sem toppar það að koma aftur heim, og þá meina ég bæði til Íslands og til Reon sem hefur lengi verið eitt öflugasta hugbúnaðarhús landsins. Ég tók mín fyrstu skref í hönnun hjá Reon og það er virkilega spennandi að snúa aftur eftir rúm sjö ár í burtu og fá tækifæri til að leiða hönnunarsviðið á þessum spennandi tímum.” er haft eftir Orra Eyþórssyni, nýjum hönnunarstjóra Reon.