Mat­væla­stofnun gerir ekki athugsemdir við kjötvinnslu í Álfa­bakka

Þetta kemur fram í umsögn Matvælastofnunar til Skipulagsstofnunar varðandi kjötvinnsluna sem birt er í skipulagsgátt. Hagar, eigandi Aðfanga sem rekur meðal annars Ferskar kjötvörur, áforma að endurnýja kjötvinnslu fyrirtækisins sem nú er starfrækt að Síðumúla 34 í Reykjavík í byggingunni. Hafa Hagar gert leigusamning við Álfabakka 2 ehf. varðandi rekstur kjötvinnslu.

Það kemur í hlut Skipulagsstofnunar að taka ákvörðun hvort leyfi fyrir kjötvinnslu verður veitt. 

Byggingarfulltrúi stöðvaði framkvæmdir

Búseti húsnæðissamfélag fór fram á í erindi til byggingarfulltrúa Reykjavíkurborgar í nóvember í fyrra að fyrirhuguð notkun byggingarinnar, þar með talin kjötvinnslan, yrði tekin til skoðunar.

yggingarfulltrúi tilkynnti í lok janúar að framkvæmdir við kjötvinnslu skyldu tafarlaust stöðvaðar þar sem ekki lægi fyrir upplýsingar um umhverfismat framkvæmda og áætlana vegna kjötvinnslunnar.

Áformað er að setja upp kjötvinnsluna í vesturenda byggingarinnar umtöluðu sem stendur við Álfabakka 2a. Í skýrslu sem verkfræðistofan Verkís vann fyrir Álfabakka 2 ehf. er fyrirætlunum Haga lýst nánar.

Tvö hundruð metrar í næsta íbúðarhús

Í skýrslunni kemur fram að Ferskar kjötvörur noti sendibíl til útkeyrslu í verslanir og tveir til fimm bílar á dag komi með aðföng kjötvinnslunnar. Samkvæmt umferðargreiningu fari þúsundir bíla á degi hverjum um Álfabakka og nærliggjandi götur. Í því samhengi verði umfang umferðar vegna kjötvinnslunnar óverulegt.

Engin efni séu notuð við kjötvinnsluna sjálfa, en tæki og húsnæði er sápuþvegið og sótthreinsað. Frárennsli frá vinnslunni fari í gegnum fituskiljur á leið þess í fráveitu Reykjavíkurborgar. Úrgangur (lífrænn og almennt sorp) sé geymdur innandyra í sérhönnuðum rýmum vinnslunnar.

Helsti hávaði sem tengist kjötvinnslunni komi frá vélbúnaði kælikerfis, sem girtur sé af með hljóðdempandi skjólvegg. Um 200 metrar séu í íbúðarhús sem er næst kjötvinnslunni og líklegt sé að á þeirri leið minnki hávaði umtalsvert og sé marktækt innan leyfilegs hljóðsstyrks við húsvegg íbúðarhússins.

Starfsemin verði á skilgreindu miðsvæði þar sem gert er ráð fyrir verslunar- og þjónustustarfsemi. Fyrir liggi álit skipulagsfulltrúa Reykjavíkurborgar um að á miðsvæðum borgarinnar sé almennt heimilt að vera með hreinlega atvinnustarfsemi og léttan iðnað, sem kjötvinnsla Ferskra kjötvara geti fallið undir.

Niðurstaðan Verkís og Álfabakka 2a sé að kjötvinnslan sé ekki líkleg til að hafa í för með sér umtalsverð umhverfisáhrif og skuli því ekki háð mati á umhverfisáhrifum.

Sérhver hlekkur geti haft áhrif

Í umsögn Matvælastofnunar segir að aðkoma stofnunarinnar snúi fyrst og fremst að því að gæta að gæðum, öryggi og hollustu matvæla. Aðkoma stofnunarinnar að umræddri starfsermi lúti þannig eingöngu að leyfisveitingum og eftirlilti með tilliti til matvælaöryggis.

Til að tryggja öryggi matvæla þurfi að skoða framleiðsluferli matvæla sem samhangandi heild, allt frá frumframleiðslu til sölu eða afhendingar matvæla til neytenda, því að sérhver hlekkur geti haft áhrif á öryggi matvæla.

„Hvað varðar staðsetningu matvælafyrirtækja, þ.e. fyrirtækja sem reka starfsemi í tengslum við framleiðslu, vinnslu eða dreifingu matvæla á einhverju stigi, þá ber að horfa til þess hvort af staðsetningu fyrirtækis stafi hætta á mengun matvæla. Stofnunin hefur ekki ástæðu til að ætla að umrædd staðsetning hafi í för með sér sérstaka hættu á mengun matvæla,“ segir í umsögn Matvælastofnunar.

Matvælastofnun telur sig því ekki hafa forsendur til að gera athugasemdir við fyrirliggjandi mat á umhverfisáhrifum.

Fréttin hefur verið uppfærð.