Svona var fjögurra rétta mat­seðillinn

Þriggja daga ríkisheimsókn forsetahjónanna til Noregs hófst í gær, en með í för eru meðal annars Þorgerður Katrín Gunnarsdóttir utanríkisráðherra og Daði Már Kristófersson, fjármála- og efnahagsráðherra, auk fulltrúa úr opinberri sendinefnd og viðskiptasendinefnd.

Gestgjafar forsetahjóna í Noregi eru Haraldur V. konungur og Sonja drottning ásamt Hákoni krónprins og Mette-Marit krónprinsessu. Að auki tekur elsta dóttir þeirra, Ingiríður Alexandra prinsessa, þátt í sinni fyrstu ríkisheimsókn.

Haraldur V Noregskonungur og Halla fluttu bæði ræðu í hátíðarkvöldverðinum þar sem mikið var um dýrðir. Athygli vakti að Halla þurfti að gera hlé á ræðu sinni þegar hún varð vör við veikindi eins gestsins, en hann ku þó vera við góða heilsu nú.

Á heimasíðu norsku konungsfjölskyldunnar hefur verið birtur matseðill hátíðarkvöldverðarins og leit hann út á þessa leið:

• Aspas
• Bjarnarlauksmajónes, síldarhrogn, súrsaður rauðlaukur
• Flatkökur með Afrodite-osti

***

• Hörpudiskur
• Agúrka
• Papríkuflögur

***

• Andabringa
• Kartöflupúrré, broccolini
• Grillað grasker, piparsósa

***

• Hvítt sukkulaði
• Hindber og bergamía

Annar dagur hefst á heimsókn í Innovation Norway

Á vef forseta Íslands segir að dagskrá dagsins í dag hefjist í höfuðstöðvum Innovation Norway, systursamtaka Íslandsstofu, þar sem efnt verði til norsk-íslensks viðskiptaþings um sameiginlega hagsmuni þjóðanna í grænni umbreytingu.

„Þaðan halda forsetahjón í Fontenehuset þar sem borgarstjóri Óslóar segir gestunum frá endurhæfingarstarfi fyrir fólk sem glímir við geðraskanir. Að því loknu eiga forseti og utanríkisráðherra fund með Jonas Gahr Støre forsætisráðherra og snæða svo hádegisverð í boði ríkisstjórnar Noregs.

Sjónum beint að bókmenntaarfinum

Síðdegis á miðvikudag fer fram menningarviðburður í Óslóarháskóla þar sem sjónum verður beint að bókmenntaarfi þjóðanna. Skáldin og rithöfundarnir Gerður Kristný, Knut Ødegård og Mette Karlsvik taka þar þátt í umræðum sem Halldór Guðmundsson rithöfundur stýrir.

Um kvöldið býður forseti Íslands til móttöku til heiðurs Haraldi konungi og Sonju drottningu. Þar reiðir íslenska kokkalandsliðið fram veitingar, Ari Eldjárn fer með gamanmál og Benjamín Gísli Einarsson tónskáld leikur á píanó.

Niðarósdómkirkja heimsótt

Á þriðja degi heimsóknarinnar fylgir Hákon krónprins forsetahjónum og opinberri sendinefnd til Þrándheims, ásamt Tore O. Sandvik, varnarmálaráðherra Noregs. Á dagskránni í Þrándheimi er viðskiptaviðburður um bláa hagkerfið þar sem forseti og Daði Már Kristófersson, fjármála- og efnahagsráðherra, flytja ávörp.

Síðar um daginn heimsækja forsetahjón heimavarnardeild norska hersins í Værnes þar sem þau kynna sér þjálfunar- og endurhæfingarverkefni sem Norðmenn bjóða fyrir úkraínska hermenn.

Forsetahjón heimsækja einnig Niðarósdómkirkju sem á rætur djúpt í sameiginlegri sögu Íslands og Noregs. Ríkisheimsókninni lýkur í Þrándheimi síðdegis 10. apríl og koma forsetahjón aftur til Íslands á fimmtudagskvöld,“ segir í tilkynningunni.