Flýta göngum til að forða fé af fjöllum

Búist er við samgöngutruflunum og ekki er mælt með ferðalögum á svæðinu. Þá eru gular viðvaranir í gildi á Austurlandi og Miðhálendinu til miðnættis annað kvöld. Óvissustigi almannavarna hefur verið lýst yfir vegna veðursins á Ströndum og Norðurlandi og fólk er beðið um að fylgjast vel með spánni. Upplýsingum um veðrið hefur einnig verið beint til ferðamanna sem eru hvattir til að aðlaga eða breyta ferðaáætlunum sínum eftir atvikum.

Bændur flýttu göngum til að koma fé af fjöllum. Þorvarður Ingimarsson fjallskilastjóri í Fljótsdalshreppi er einn þeirra sem hafa staðið í ströngu í dag. 

„Við vorum inn við Snæfell að smala og það gekk bara vel. Það var fyrirhugað að byrja í dag en við ákváðum að flýta þessu og byrja að smala í gær. Við erum þá búnir að smala í tvo daga núna og það gekk bara ágætlega. Þó það væri versnandi veður í dag, þá sleppur þetta alveg,“ segir Þorvarður.

Veðrið segir hann að sé ágætt enn, það er að segja inni í sveit. 

„En það var farið að snjóa og orðið töluvert hvasst uppi á heiði, þegar ég kom niður. Það er versnandi veður á heiðinni og full ástæða til þess að ná fénu af hæstu hæðum.“

Bændur voru samt sem áður við því búnir að þurfa að taka féð niður. Það seti því ekki strik í reikninginn. 

„Það er mun einfaldari aðgerð að flýta þessu og fara fyrr af stað. En við förum ekki af stað á morgun og vonandi getum við farið á miðvikudaginn.“