Hélt að hann myndi aldrei vinna aftur: „Ég get ekki hætt að gráta“

Þetta var fyrsti brautarsigur Hamiltons síðan í desember árið 2021, en sjöfaldi heimsmeistarinn var að vinna sína 104. keppni á ferlinum. Hann er sá ökuþór sem hefur unnið flestar keppnir í sögunni og ásamt Michael Schumacher er hann sá ökuþór sem hefur oftast orðið heimsmeistari.

Eftir rúmlega tveggja ára og sjö mánaða bið eftir sigri var það því tilfinningarík stund þegar hann kom fyrstur í mark í sinni heimakeppni á Silverstone-brautinni. Með sigrinum bætti hann einnig met og er nú orðinn sá ökuþór sem hefur unnið flestar keppnir á sömu brautinni, en þetta var hans níundi sigur á Silverstone.

„Ég get ekki hætt að gráta,“ sagði Hamilton er hann steig upp úr Mercedes-bílnum eftir sigurinn. „Ég hef líklega aldrei upplifað jafn tilfinningaríkan endi á kappakstri.“

„Erfiðleikarnir sem við sem lið og ég persónulega höfum gengið í gegnum. Þessi stanslausa áskorun sem við göngum öll í gegnum að koma okkur fram úr rúminu og gera okkar besta. Við lifum á tíma þar sem andleg heilsa er alvarlegt vandamál og ég ætla ekki að ljúga því að ég hafi ekki þurft að ganga í gegnum þannig erfiðleika.“

„Það er svo oft sem að þér finnst þitt besta ekki vera nóg og það eru ótrúleg vonbrigði sem fylgja því.“

„Það hafa klárlega verið augnablik frá því ég vann síðast árið 2021 þar sem mér fannst ég ekki nógu góður. Þar sem mér leið eins og ég myndi aldrei ná að vinna aftur. Ég hef aldrei áður grátið eftir sigur. Þetta kom bara. Þetta er mögnuð tilfinning og ég er þakklátur fyrir hana.“