Körfubolti

Martin ekki meira með á tíma­bilinu en Alba Berlin komst í úr­slit

Ágúst Orri Arnarson skrifar
Martin Hermannsson hefur verið lykilmaður síðan hann gekk aftur til liðs við Alba Berlin í janúar en hann var ekki með í leik kvöldsins.
Martin Hermannsson hefur verið lykilmaður síðan hann gekk aftur til liðs við Alba Berlin í janúar en hann var ekki með í leik kvöldsins. Inaki Esnaola/Getty Images

Martin Hermannsson mun ekki spila meira á tímabilinu vegna meiðsla í kálfa en liðsfélagar hans í Alba Berlin komust áfram í úrslitaeinvígi þýsku úrvalsdeildarinnar með 97-84 sigri gegn Niners Chemnitz í kvöld. Alba mun leika til úrslita gegn Bayern Munchen. 

Martin hefur verið lykilmaður fyrir Alba Berlin frá því hann kom aftur til liðsins í janúar. Félagið greindi frá því fyrr í dag að hann yrði frá út tímabilið vegna tognunar í vinstri kálfa. 

Berlínarbúar töpuðu fyrsta leik einvígisins og lentu svo 2-1 undir með afleitu tapi í þriðja leiknum. Þar leiddi Alba Berlin lengst af í leiknum en glataði forystunni undir lokin.

Martin átti svo sannkallaðan stórleik þegar Alba Berlin jafnaði einvígið 2-2 í síðasta leik.

Leikur kvöldsins var æsispennandi og lítið skildi liðin að. Aðeins einu stigi munaði þegar þriðji leikhlutinn kláraðist, 74-73 fyrir Alba Berlin. Þeir skelltu svo vörninni í lás, fengu aðeins 11 stig á sig í fjórða leikhluta og unnu leikinn að endingu nokkuð örugglega, 97-84.

Alba Berlin mun leika til úrslita gegn Bayern Munchen.

Þýski körfuboltinn

Mest lesið


Fleiri fréttir

Sjá meira


×

Mest lesið