Nýi Draumurinn slær í gegn

„Fyrst og fremst ber að nefna að þetta er eiginlega bara fáránlega góður Draumur. Við smökkuðum vöruna auðvitað til og stilltum bragðið af í vöruþróunarferlinu en þegar við fengum fyrstu framleiðsluna af lokaútgáfunni í hendurnar í síðustu viku þá tókum við eiginlega bara andköf, svo góður þótti okkur þessi nýi Draumur. Viðtökurnar fyrstu dagana hafa verið framúrskarandi og bindum við miklar vonir við þessa vörunýjung,“ segir Pétur Thor Gunnarsson, framkvæmdastjóri Freyju. 

„Okkur fannst vanta fylltan lakkrís að hætti Freyju í þessa flóru og það er greinilegt að landsmenn eru sammála okkur og kunna vel að meta þessa nýjustu vöru okkar. Upprunalegi Draumurinn hefur notið stöðugra vinsælda frá fyrsta degi og Sterki Draumurinn sló líka í gegn fyrir fjórum árum síðan.“

Í ár eru, ótrúlegt en satt, 40 ár síðan Lakkrís Draumur, kom á markað. „Útlit umbúðanna og auglýsingaherferðin er með skemmtilegum retro blæ og sækir í árin kringum 1984 en það ár kom Lakkrís Draumur fyrst á markað. Það kom ekkert annað til greina en að fá sjálfan Herbert Guðmundsson til að leika í auglýsingunni okkar sem var frumsýnd í sjónvarpi í gær þriðjudag. Þar endurvekur hann meðal annars frasann „Góður Draumur maður“ sem Jónsi, oft kenndur við hljómsveitina Í svörtum fötum, sagði einmitt í eldri auglýsingu en þessi frasi er einmitt mjög lífseigur. 

Við létum líka búa til einfaldan og skemmtilegan retro tölvuleik þar sem þátttakendur stjórna sportbíl með Hebba og klára hringinn með honum. Leikinn má finna á godurdraumur.is og ég hvet sem flesta til að prófa hann.“

Þótt grunnhugmyndin að vörunni sjálfri hafi ekki tekið langan tíma tók öllu lengri tíma að hanna réttu umbúðirnar að sögn Péturs. „Vöruþróunarferlið var ótrúlega einfalt fyrir þessa vöru. Við vissum strax við fyrstu prufur að þarna værum við með eitthvað geggjað í höndunum. Hins vegar lékum við okkur með mjög margar tillögur að útliti umbúðanna en fannst samt ekkert passa nógu vel. Þá datt okkur í hug að tengja umbúðirnar við 40 ára afmælið og við tímabilið þegar varan kom fyrst á markað. Sú hugmynd svínvirkaði og þegar 80‘s útlitið var komið þá var eins og fyrr segir eiginlega ekki annað hægt en að láta goðsögnina sjálfa, Herbert Guðmundsson, leika í auglýsingunni.“

Pétur segir alveg koma til greina að setja nýja Drauma á markað á næstu árum. „Fyrst ætlum við að sjá hvernig sá nýjasti spjarar sig en það eru vissulega líkur á því að fleiri nýir Draumar komi á markað á næstu árum.“