Gæti dregið til tíðinda á næstu klukku­stundum

Þetta kom fram í viðtali við hann í kvöldfréttum Stöðvar 2.

„Ég held að það sé líklegt að það fari eitthvað að gerast, en spurningin er: Hvað gerist? Eins og staðan er í dag erum við með kviku sem streymir úr dýpri kvikugeymslu sem er á átta til tólf kílómetra dýpi. Hún er mjög stór, það er mikil kvika í henni sem streymir upp eftir gosrásinni. Hluti af henni fer alla leið uppá yfirborðið en hluti hefur verið að fara í þetta grynnra í geymsluhólf sem er undir Svartsengi. Núna er það orðið fullt og þá er spurningin: Hvernig er áframhaldið?“

Þorvaldur segir einn möguleika vera að kvikan sem áður fór í grynnra hólfið fari og bætist við það sem komi nú þegar á yfirborðið á meðan myndi það sem er í hólfinu kólna.

Annar möguleiki sé að kvikan fari af stað úr hólfinu, en flæði upp úr sömu sprungu. Það myndi þýða að gosflæðið myndi aukast enn meira en í fyrri möguleikanum.

Hvenær gerist þetta? Hvenær haldið þið að eitthvað gerist?

„Þetta er komið á það stig að maður býst við því að þetta gerist bara þá og þegar. Ég myndi segja að þetta geti verið klukkustundir, og ekki mikið meira en dagar.“