Sagður eyði­leggja fyrir Grind­víkingum með hegðun sinni

Ólafur Benedikt Arnberg Þórðarson er fyrrverandi skipstjóri og nú veitingamaður í Grindavík. Óhætt er að segja að hann sé þreyttur á því að Grindvíkingar fái ekki að gista í heimabæ sínum á meðan jarðskjálftamælar hreyfist varla og líkur á eldgosi séu sagðar fara snarminnkandi.

Hann ætlaði sér að sofa í húsi sínu í Grindavík með eiginkonu sinni í gærkvöldi. Hann hefur unnið þar að viðhaldi á veitingastað sínum og hóteli undanfarna daga athugasemdalaust.

„Það kom lögreglumaður fyrst og annar óeinkennisklæddur með honum. Þeir ætluðu að vísa okkur út. Ég sagði bara nei, ég ætla ekki að fara,“ segir Ólafur Benedikt.

Tekið þátt í öllum skjálftum frá 1968

„Ég hef verið að gista bæði á hótelinu mínu og hérna í nokkra daga. Það er ekkert að í Grindavík. Ég hef búið hérna síðan 1968, tekið þátt í öllum jarðskjálftum síðan. Þetta er bara orðið hlægilegt. Ég hef tekið þátt í þremur fyrirtækjafundum. Alls staðar talað um það að einhleypingar og barnlaus hjón gætu búið í sínum húsum því sem betur fer er ekki nema lítið brot af Grindavík sem er laskað.“

Hann hafi þverneitað að yfirgefa bæjarfélagið.

„Svo komu tvær lögreglukonur með sama erindi. Ég sagði þeim að ég færi hvergi. Það er náttúrulega búið að opna Bláa lónið, þar eru fleiri hundruð manns í baði sem er eini hugsanlegi staðurinn þar sem getur gosið. Þær hlustuðu náttúrulega ekkert á það. Fóru og sögðust ætla að koma eftir klukkutíma. Þá skildi ég vera viðbúinn hverju sem er. Og að ég gerði mér grein fyrir því að ég væri að eyðileggja tækifæri Grindvíkinga til að fara heim til sín nokkurn tímann.“

Lögreglukonurnar sneru aftur skömmu síðar með handtökuheimild.

Elt með blikkandi ljós

„Þær voru kurteisar en farið að síga í brúninni á annarri. Þegar hún setti upp leðurhanska og hótaði mér handtöku þá sagði konan: „Við förum núna en komum örugglega aftur“. Svo fórum við bara. Lögreglan elti okkur austur að Krýsuvíkurafleggjara með blikkandi ljós á eftir okkur. Þetta er bara svo fáránlegt.“

Hann sér ekki annað fyrir sér en að vera í Grindavík um jólin.

„Við erum að afpanta rútur sem hafa pantað veitingar frá okkur mörgum sinnum í viku. Tveir hópar eftir 29. og 30. desember. Það er búið að senda tölvupóst á lögreglunni og allt þetta apparat. Frá upphafi hefur ekki verið eitt einasta svar fyrir utan að Sigurður Bergmann hjá lögreglu hleypti okkru inn til að gá að eigum okkar. Þar fer einstakur ljúflingur,“ segir Ólafur Benedikt.

Honum er ekki skemmt.

„Þetta er til háborinnar helvítis skammar. Öll þessi upplýsingamiðlun sem átti að liggja fyrir. Hvar er hún? Hún er engin. Á öllum þessum fundum er talað um það sama. Það er engum svarað.“

Fleiri gisti í Grindavík

Hann ætlar að skoða réttarstöðu sína í dag en hann er á leiðinni til Grindavíkur á nýjan leik.

„Lögreglan er ekki að henda fleirum út. Ég veit það eru fleiri sem hafa gist, en það breytir ekki minni stöðu. Ég tekst á við hana og þá sér fólk hver réttarstaða þeirra er,“ segir Ólafur.

„Ég vona bara að þessari vitleysu fari að ljúka. Það er sagt vera hættustig en jarðskjálftamælarnir sýna bara eina beina línu.“

Jól í Grindavík?

Úlfar Lúðvíksson lögreglustjóri á Suðurnesjum segir í samtali við fréttastofu ekki loku fyrir skotið að Grindvíkingar haldi jól í heimabæ sínum.

„Ég myndi telja að það væru líkur á að íbúar Grindavíkur gætu haldið jól í bænum miðað við stöðuna núna. Við verðum að bíða og sjá hvað veðurstofan segir í uppfærðu hættumatskorti á miðvikudag.“

Nánar verður rætt við Úlfar í hádegisfréttum Bylgjunnar.