Um fimm­tíu bílar við lokunarpóst

Að mati ljósmyndara Vísis, sem er á vettvangi, Vilhelm Gunnarssonar, eru um 50 bílar að bíða. Hann segir flesta rólega en að einhverjir séu í miklu uppnámi. Hann segir lögreglu nú vinna að því að vísa fólki burt. 

Einn þeirra sem bíður er Ervin, íbúi frá Grindavík.

„Við erum búin að vera hérna í um hálftíma. Við ætlum að bíða þar til við fáum að fara inn,“ sagði ERvin í samtali við fréttastofu. Hann sagðist ekki hafa fengið neinar upplýsingar eða leiðbeiningar um það hvernig eða hvenær hann fengi að fara inn.

Ervin yfirgaf bæinn ásamt fjölskyldu sinni um miðja nótt fyrir tveimur dögum.

„Við fórum um miðja nótt. Krakkarnir voru grátandi og við gátum ekki verið lengur,“ segir Ervin og að allt sem þau eigi sé enn í Grindavík. Mest vilji þau komast til bæjarins til að sækja ýmis skjöl og fatnað.