Haf hjónin selja sögufræga miðbæjarperlu

Húsið var byggt árið 1916 af Einari Arnórssyni ráðherra og bjó meðal annars Nóbelsskáldið Halldór Laxness í húsinu á árunum 1930 til 1939. Sagan segir að hann hafi meðal annars ritað bækurnar Heimsljós, Sölku Völku og Sjálfstætt fólk þegar hann bjó þar

Hjónin keyptu eignina fyrir þremur árum og hafa gert það alfarið upp á einstakan hátt með áherslu á upprunalegan stíl og sjarma.

„Við ákváðum þess vegna að fara frekar klassíska leið í endurbótum. Við héldum í upprunalega skrautlista og rósettur í loftum, og bættum við þar sem þurfti. Allir veggir voru kalkmálaðir sem gefa rýmunum mikinn sjarma. Svo ákváðum við að velja HAF FRONT í náttúrulegri eik fyrir eldhúsið, einnig lögum við gegnheila eik í síldarbein á neðri hæð,“ segir Hafsteinn.

Eignin er um 200 fermetra að stærð á tveimur hæðum með stórum gluggum og útsýni yfir Reykjavíkurtjörn.

Á efri hæðinni er svefnherbergisgangur með þremur rúmum herbergjum, baðherbergi og svalir til norðurs þar sem horft er út á Reykjavikurtjörn. 

Neðri hæðin er búin tveimur rúmgóðum og björtum stofum með mikilli lofthæð og kamínu í annarri stofunni. 

Nánari upplýsingar má nálagast á fasteignavef Vísis.

Líður vel í miðbænum

Fjölskyldunni líður vel í miðbænum og ætlar að halda sér innan hverfisins þar sem þau geta gengið á milli vinnu og skóla.

„Það er partur af okkur sem vill ekki fara héðan en svo kom upp spennandi verkefni sem gæti hentað. Það er stærra einbýlishús með stórum garði,“ segir Karitas.

„Þetta var í rauninni alveg óvænt. Við erum með bílskúr sem við ætluðum að fara gera eitthvað við.

En svo var það bara að hrökkva eða stökka. Það er bara gaman að prufa og sjá hvort þetta gangi,“ upplýsir Karitas.

 Hún var í þann mund að taka á móti fólki sem hafði sýnt húsinu áhuga þegar blaðamaður náði tali af henni.

Hjónin þykja með eindæmum smekkleg og hefur verið fjallað um heimilin þeirra nokkrum sinnum í  þáttunum Heimsókn með Sindra Sindrasyni. Hér að neðan má sjá þátt frá árinu 2020 þegar þau bjuggu á Sólvallagötu.