„Þetta verður bras fyrir Lakers“

LeBron James mætir þarna einum af höfuðandstæðingum sínum, Stephen Curry. Þeir þekkjast ansi vel eftir að hafa leikið saman í deildinni frá 2009 og mæst í úrslitum fjögur ár í röð (2015-18).

Hörður Unnsteinsson og Tómas Steindórsson hafa meiri trú á Golden State en Lakers komist í úrslit Vesturdeildarinnar. Þeir ræddu einvígið í Lögmáli leiksins í kvöld.

„Fyrir mér eru Golden State mun sigurstranglegari í þessu einvígi vegna þess hversu mikla athygli Stephen Curry dregur fram og mun setja á frekar slaka Lakers-vörn,“ sagði Hörður. 

„Við höfum séð að besta vörnin á móti Golden State er alls herjar skiptivörn eins og Houston Rockets komu í raun fyrstir með 2017. Það er besta vopnið á móti þeim en Lakers er einfaldlega ekki með lappir eða menn til að framkvæma þannig varnarleik.“

Tómas segir hægara sagt en gert að dekka Curry. „Þegar maður fylgist með Curry, þú getur aldrei slakað á í sekúndubrot. Þá er hann kominn með frítt skot. Í 24 sekúndur hleypur hann út um allt og leitar að opnun. Þetta verður bras.“

Lögmál leiksins er á dagskrá Stöðvar 2 Sport 2 klukkan 20:00 í kvöld.