Segja upp 18 þúsund manns

Alls starfa um 1,5 milljónir manns hjá Amazon að því er segir í frétt BBC.

Forstjórinn Andy Jassy segir að ákveðið hafi verið að tilkynna opinberlega frá fyrirhuguðum uppsögnum eftir að „einn úr hópi [háttsettra starfsmanna] hafi lekið upplýsingunum til utanaðkomandi aðila“.

Amazon bætist með þessu í hóp tæknirisa sem segir upp starfsfólki í stórum stíl vegna hækkandi verðlags sem hefur leitt til þess að neytendur haldi í auknum mæli að sér höndum.

Í minnisblaði Jassy kemur fram að meirihluti þeirra sem sagt verður upp séu í verslanadeild fyrirtækisins, auk mannauðsdeildar. Ekki er tekið fram fram í hvaða löndum starfsfólki verður sagt upp, en Jassy gaf í skyn að það verði meðal annars í Evrópu. Byrjað verði að hafa samband við starfsfólk eða fulltrúa þeirra vegna fyrirhugaðra uppsagna þann 18. janúar.

Stjórnendur fyrirtækisins höfðu gefið í skyn á síðasta ári að til stæði að fækka starfsfólki án þess þó að nefna nokkurn fjölda í því samhengi. Áður hafði fyrirtækið stöðvað allar nýráðningar og sömuleiðis stöðvað framkvæmdir við stækkun vöruhúsa fyrirtækisins víða um heim. Var nefnt í því samhengi að fyrirtækið mæti það sem svo að of geist hafi verið farið í ráðningar á tímum heimsfaraldursins. Alger sprenging varð í netverslun í heimsfaraldrinum.