Við­búin ef mikil­vægir inn­viðir verða fyrir skakka­föllum á morgun

Vestfirðingar byrjuðu að finna fyrir norðvestan stórhríð í morgun og fóru björgunarsveitir á svæðinu í um tíu verkefni í dag. 

Rúta fór út af vegi við Hvammstanga snemma í morgun og var björgunarsveit í Bolungarvík kölluð út vegna skilta sem voru að fjúka og búfénaðar sem þurfti aðstoð vegna fannfergis. Þá voru björgunarsveitarmenn kallaðir til þegar flotbryggja losnaði á Bolungarvík um miðjan dag í dag.

Skoða hvort flytja þurfi mannskap

Á morgun er spáð óveðri sem getur spillt færð og valdið foktjóni, fyrst á Norðausturlandi í nótt sem gengur síðan vestur yfir Norðurland og nær hámarki á Vestfjörðum seinnipart dags á morgun.

Davíð Már Bjarnason, upplýsingafulltrúi Landsbjargar, segir björgunarsveitir nú yfirfara búnað sinn og skoða hvort flytja eigi tæki og mannskap norður og vestur á land. Er einna helst horft til Vestfjarða þar sem spáð er norðvestan 20 til 28 metrum á sekúndu á morgun. Víðar er búist við hríð og nokkru fannfergi.

Davíð segir að þeim skilaboðum sé beint til fólks á Norðvestur- og Norðausturlandi að halda sig til hlés og sleppa því að ferðast að óþörfu milli staða. Þá skuli það huga vel að útbúnaði sínum ef þau þurfa að vera á ferðinni.

Funda með Landsneti og fleiri aðilum

Fulltrúar Landsbjargar hafa fundað um stöðuna í dag með fulltrúum almannavarna og fyrirtækja sem reka mikilvæga innviði á borð við rafmagnsflutnings- og fjarskiptakerfi. Hefur meðal annars verið unnið að því að samræma viðbrögð helstu aðila.

„Menn eru líka að horfa til reynslunnar á síðustu árum, aðilar vilja vera klárir ef einhverjir mikilvægir innviðir verða fyrir einhverjum skakkaföllum. Þá er kannski aðalhugmyndin að vera með nóg af tækjum og tólum svo grípa megi inn í það,“ segir Davíð.

Hann segir mjög mikilvægt að fólk á þessum svæðum fylgist vel með á morgun. Mjög slæmu veðri sé spáð víða á landinu og sífellt líklegra að sú spá verði að veruleika.

Veðurstofa Íslands hefur gefið út appelsínugula viðvörun vegna veðurs fyrir Breiðafjörð, Vestfirði, Strandir og Norðurland vestra. Viðvörunin er í gildi frá klukkan 10 í fyrramálið fram til 23.

Gul viðvörun vegna hefur verið gefin út fyrir höfuðborgarsvæðið, Faxaflóa, Norðurland eystra, Austurland að Glettingi og Miðhálendið. Spáð er norðvestan og vestan 15 til 23 metrum á sekúndu á morgun. Hvassara verður í vindstrengjum norðvestantil, og talsverð eða mikil slydda eða snjókoma um norðanvert landið. Hægari vindur og skúrir eða él sunnanlands. Úrkomuminna og dregur úr vindi seint annað kvöld.