Filippus gekkst undir hjartaaðgerð og verður áfram á sjúkrahúsi

Hann mun þó verja næstu dögum á sjúkrahúsi.

Filippus var upprunalega fluttur á sjúkrahús þar sem honum leið ekki vel. Í kjölfarið var sagt að hann væri með sýkingu. Á mánudaginn var hann svo fluttur á St Barholomew's sjúkrahúsið í Lundúnum, sem er með stærstu hjartadeild í Evrópu og er elsta sjúkrahús Bretlands.

Í frétt BBC er rifjað upp að skömmu fyrir jólin 2011 var prinsinn fluttur á sjúkrahús með þyrlu vegna brjóstverkja. Hann fór þá í aðgerð vegna stíflaðrar slagæðar.

Filippus verður hundrað ára gamall í júní. Hann er sá maki drottningar eða konungs Bretlands sem hefur borið þann titil lengst.