Hræðast ekkert meira en að hann verði tekinn

Þau hafa alið hann upp, elskað, fætt og klætt frá því hann kom til þeirra rúmlega ársgamall. Nú er drengurinn á þriðja aldursári og þau hræðast ekkert meira en að hann verði tekinn frá þeim en kynmóðirin hefur alltaf barist fyrir því að fá hann til baka.

Í Fósturbörnum í kvöld fá áhorfendur að kynnast þeim Sibbu og Gesti, fóstursyni þeirra og því erfiða ferli sem fósturforeldrar ganga í gegnum.

„Frá degi eitt höfum við alltaf spilað sama lagið alveg frá því að hann kom. Alltaf sett plötu á fóninn og spilað þetta lag. Alltaf leggur hann höfuðið á öxlina á mér og fílar sig,“ segir Gestur sem tók á móti drengnum fimmtán mánaða gömlum ásamt eiginkonu sinni.

„Hann er í tímabundnu fóstri, eins og er. Við ætluðum svo sem ekki þessa leið og vorum við búin að reyna flest allt annað,“ segir Sibba en það var aldrei markmið þeirra að taka barn í fóstur og í raun ekki. 

„Við vorum reyndar búin að ákveða að fara aldrei þessa leið, það var nú fyrsta yfirlýsingin. En hér stöndum við í dag,“ segir Gestur.