Kanna mögu­leikann á að flytja út vetni

Svo gæti farið að vetni framleitt hér á landi verði að útflutningsvöru en Landsvirkjun og hafnaryfirvöld í Rotterdam í Hollandi hafa undirritað viljayfirlýsingu um að farið skuli í forskoðun á fýsileika þess að flytja út grænt vetni. Frá þessu er greint í Morgunblaðinu í dag.

Yfirlýsingin felur í sér að aðilarnir deili þekkingu og reynslu með það í huga að finna flöt á samvinnu og leita tækifæra í vetnismálum, eins og það er orðað í blaðinu.

Hörður Arn­ar­son, for­stjóri Lands­virkj­un­ar, seg­ir í samtali við blaðið að markaður fyrir grænt vetni á meginlandi Evrópu verði án efa gríðarstór í fyllingu tímans og að samkomulagið muni gera Landsvirkjun kleift að fylgjast með þeirri þróun og taka þátt frá upphafi.

Þá segir að Rotter­da­mhöfn sé stærsta höfn Evr­ópu og ein mik­il­væg­asta orku­höfn í heimi og að hafnafyfirvöld þar hafi sett fram metnaðarfull áform í þessum efnum en í þeim felst meðal annars að Rotterdam verði verði aðal­inn­flutn­ings­höfn fyr­ir vetni til orku­kaup­enda í Evr­ópu.

Hol­lensk yf­ir­völd muni hafa falið Rotterdamhöfn að kort­leggja hvar hægt væri að finna grænt vetni og því hafi bönd­in borist að Íslandi, segir enn fremur í blaðinu.