Sam­ræmt kerfi til að auð­velda ferða­lög til skoðunar

Evrópusambandið hefur nú til skoðunar að koma á fót samræmdu kerfi til að auðvelda megi ferðalög innan evrópska efnahagssvæðisins á tímum heimsfaraldursins. Áslaug Arna Sigurbjörnsdóttir dómsmálaráðherra segir ekki útilokað að slíkt myndi hafa í för með sér breytingar á fyrirkomulagi landamæraskimunar hér á landi.

Fréttablaðið segir frá þessu, en þýsk stjórnvöld, sem eru nú í forsæti ráðherraráðs sambandsins, kanna nú að koma á litakóða fyrir frjálsa för milli landa sambandsins og EES-ríkja þar sem litir myndu miðast við nýgengi smita. Myndu reglur ekki vera bindandi og ekki ná til vörubílstjóra, sjófarenda eða annarra sem ferðast vegna starfa sinna.

Blaðið hefur eftir Áslaugu Örnu að íslensk stjórnvöld hafi sent frá sér athugasemdir til sambandsins vegna málsins í gær. Var því komið á framfæri að Íslendingar hafi skimað á landamærum og standi vilji til þess að þar verði gert áfram.

Óvíst er hvenær slíkar reglur myndu taka gildi en núgildandi fyrirkomulag á landamærum Íslands gilda til 1. desember. Áslaug Arna kveðst þó ekki útiloka að breytt fyrirkomulag verði tekið upp, nái tillögur Evópusambandsins fram að ganga.