Kári miðlar til þeirra yngri: Gjöri svo vel að hafa trú á því sem hefur virkað

Kári Árnason segir að yngri leikmenn íslenska landsliðsins „verði að gjöra svo vel að hafa trú“ á þeim gildum sem skiluðu liðinu í fremstu röð.

Ísland mætir Englandi, liði sem komst í undanúrslit HM 2018 og hlaut bronsverðlaun í Þjóðadeildinni í fyrra, á Laugardalsvelli á morgun. Í íslenska hópinn vantar marga lykilmenn en þar með gefst yngri mönnum tækifæri á að sýna sig og sanna.

Kári, sem verður fyrirliði á morgun, er hrifinn af framgöngu ungu liðsfélaganna en sá yngsti er Andri Fannar Baldursson, 18 ára leikmaður Bologna á Ítalíu, sem er helmingi yngri en Kári.

„Ég er mjög „imponeraður“ af Andra Fannari. Hann er 18 ára gamall, svo ég gæti auðveldlega verið pabbi hans. Þetta er vinnusamur strákur með mikil fótboltagæði, góður með boltann, en hógvær og flottur strákur,“ sagði Kári á hlaupabrautinni á Laugardalsvelli í dag, í öruggri fjarlægð frá spyrli vegna Covid-ráðstafana.

Aðspurður hvernig takist að miðla gildum íslenska liðsins til þeirra yngri, aganum og skipulaginu sem skilaði liðinu á EM og HM, og blanda saman hópnum, sagði Kári:

„Það er skiljanlegt að ég sem nánast pabbi Andra, að við séum ekki alltaf að hanga saman inni á herbergi. En við erum liðsfélagar engu að síður. Maður reynir að miðla einhverju til þeirra sem eru að spila leikina og innstilla þá á það sem við höfum sett megináherslu á í gegnum tíðina. Þannig að það breytist ekki of mikið með tilkomu nýrra leikmanna. Þeir verða að gjöra svo vel að hafa trú á því. Ef þeir eru fótboltamenn þá hafa þeir trú á því, annars kæmust þeir ekki langt,“ sagði Kári.

Mun yngri og með gríðarleg gæði fram á við

Kári var vitaskuld í íslenska liðinu sem komst í 8-liða úrslit á EM 2016 með því að slá út England. Mikið vatn hefur runnið til sjávar síðan þá.

„Munurinn á enska liðinu frá því fyrir fjórum árum er náttúrulega sérstaklega sá að þeir eru búnir að yngja upp – meðalaldurinn er um 25 ár – á meðan að á EM voru þeir, ekki kannski á síðustu metrunum, en með eldra og reyndara lið. Gæðin hjá þeim fram á við eru þannig að menn þar hafa komist í heimsklassa, eins og Raheem Sterling og Marcus Rashford sem reyndar er ekki með. En þá kemur bara Jadon Sancho inn í staðinn. Þetta er ekki eitthvað vandamál sem við eigum við að etja, að það sé allt of mikið af leikmönnum sem erfitt er að velja á milli. Gæðin eru gríðarleg hjá þeim, sérstaklega fram á við,“ sagði Kári.

Lykilatriði ef áhorfendur yrðu leyfðir gegn Rúmeníu

Engir áhorfendur verða á leiknum á morgun, og Kári tók undir að það yrði íslenska liðinu dýrmætt að UEFA breytti sínum reglum fyrir EM-umspilsleikinn við Rúmeníu í október. Íslensk heilbrigðisyfirvöld þyrftu vitaskuld einnig að samþykkja að áhorfendur yrðu leyfðir.

„Það væri algjört lykilatriði ef að það heppnaðist að við fengjum að vera með áhorfendur hérna [gegn Rúmeníu], því við erum vanir því og höfum náð góðum árangri á heimavelli. En það verður bara að koma í ljós hvernig þetta þróast á morgun. Ég hef aldrei spilað hérna fyrir tómu húsi. Það verður svolítið sérstakt,“ sagði Kári.