Samherjabörnin fá hlutabréfin frá foreldrunum

Fjórir aðaleigendur útgerðarfyrirtækisins Samherja, þar af forstjórinn Þorsteinn Már Baldvinsson, hafa framselt hlutabréfaeign sína í fyrirtækinu til barna sinna. Fyrir breytingarnar fóru eigendurnir samanlagt með 86,5% hlutafjár í Samherja en hlutur þeirra verður 2,0% eftir breytingarnar. Þetta kemur fram í tilkynningu frá Samherja.

Umræddir aðaleigendur eru auk Þorsteins þau Helga Steinunn Guðmundsdóttir, Kristján Vilhelmsson og Kolbrún Ingólfsdóttir.

Stærstu hluthafar verða nú Baldvin Þorsteinsson og Katla Þorsteinsdóttir, sem munu fara samanlagt með um 43,0% hlut í Samherja og Dagný Linda Kristjánsdóttir, Halldór Örn Kristjánsson, Kristján Bjarni Kristjánsson og Katrín Kristjánsdóttir sem munu fara samanlagt með um 41,5% hlutafjár.

Í tilkynningu segir að undirbúningur þessara breytinga hafi staðið undanfarin tvö ár. Áformin og framkvæmd þeirra hafi formlega verið kynnt í stjórn félagsins á miðju ári 2019.

„Með þessum hætti vilja stofnendur Samherja treysta og viðhalda þeim mikilvægu fjölskyldutengslum sem félagið hefur ætíð byggst á og hafa verið hornsteinn í rekstrinum,“ segir í tilkynningu.

Frændurnir halda ótrauðir áfram

Þorsteinn Már mun áfram gegna starfi forstjóra og Kristján Vilhelmsson verður áfram útgerðarstjóri þrátt fyrir hlutabréfaframsalið. Þá varðar framsalið eingöngu hlutabréfin í Samherja hf. en ekki systurfélaginu Samherja Holding ehf.

Haft er eftir Þorsteini Má og Kristjáni í tilkynningu að „þeir frændurnir“ hafi fullan metnað til að taka þátt í áframhaldandi rekstri Samherja. Félagið eigi „mikla og bjarta framtíð og hefur vaxið og dafnað þrátt fyrir ýmsa erfiðleika.“

Erfiðleikarnir sem frændurnir vísa þar í eru líklega fyrst og fremst rannsókn héraðssaksóknara og skattrannsóknarstjóra á starfsemi fyrirtækisins í Namibíu, í kjölfar fjölmiðlaumfjöllunar þar um í lok síðasta árs. Þorsteinn Már steig tímabundið til hliðar sem forstjóri Samherja vegna málsins.

Framkvæmdastjóri og skíðadrottning

Stærstu hluthafar verða nú, Baldvin Þorsteinsson og Katla Þorsteinsdóttir, sem munu fara samanlagt með um 43,0% hlut í Samherja og Dagný Linda Kristjánsdóttir, Halldór Örn Kristjánsson, Kristján Bjarni Kristjánsson og Katrín Kristjánsdóttir sem munu fara samanlagt með um 41,5% hlutafjár.

Af þeim Samherjabörnum sem nú taka við eignarhaldi fyrirtækisins hafa Baldvin og Dagný Linda haft sig mest í frammi. 

Baldvin er sonur Þorsteins Más og fæddur árið 1983. Hann hefur starfað hjá Samherja um árabil og gegnir nú stöðu framkvæmdastjóra viðskiptaþróunar hjá Samherja. Þá er hann einnig stjórnarformaður Eimskips.

Athygli vakti í mars í fyrra þegar Baldvin lét Má Guðmundsson, þáverandi seðlabankastjóra, heyra það að loknum opnum fundi stjórnskipunar- og eftirlitsnefndar á Alþingi. Á fundinum var Samherjamálið svokallaða, þ.e. umdeild húsleit í höfuðsvöðvum Samherja, og vinnubrögð Seðlabankans í málinu til umfjöllunar.

Dagný er dóttir Kristjáns Vilhelmssonar og var um árabil fremsta skíðakona landsins. Þegar hún lagði skíðin á hilluna árið 2008 átti hún að baki átján Íslandsmeistaratitla og var sjö sinnum valin skíðakona ársins. Hún lauk BS-prófi í iðjuþjálfunarfræði við Háskólann á Akureyri árið 2013 og hefur starfað á því síðustu ár, ásamt því að sinna kennslu við HA.

Fréttin hefur verið uppfærð.