Skrautleg áskorun Ístaks að hefja smíði stærsta skóla Grænlands í veirufaraldri

Ístaksmenn glíma við einhverja skrautlegustu áskorun í sögu fyrirtækisins; að hefja smíði þrettán milljarða króna skólabyggingar á Grænlandi. Starfsmennirnir þurfa að gangast undir tvöfalt veirupróf, leiguflugvél þarf til að koma þeim út og auk þess er vinnusvæðið í Nuuk sérstök sóttkví. Þetta kom fram í fréttum Stöðvar 2.

Grænlandsverkefni Ístaks, í landi sem hefur í raun haft heimsóknarbann undanfarna tvo mánuði, er gott dæmi um þær miklu áskoranir sem íslensk fyrirtæki eru að glíma við á tímum kórónuveiru. Verkefnið, sem samið var um skömmu fyrir jól, upp á 615 milljónir danskra króna, er að smíða stærsta skóla Grænlands, sem jafnframt verður menningarmiðstöð.

Sjá einnig hér: Ístak undirritar verksamning um smíði stærsta skóla Grænlands

„Þetta er ein af þeim skrautlegustu áskorunum sem við höfum fengið. Og við þurfum náttúrlega að vera sérstaklega lausnamiðaðir í svona verkefnum,“ segir Karl Andreassen, framkvæmdastjóri Ístaks. Hann segir fyrirtækið einnig fá mikinn stuðning frá verkkaupa, sveitarfélaginu Sermersooq, sem Nuuk tilheyrir.

Ístaksmenn eru langt komnir með að setja upp vinnubúðir á byggingarsvæðinu í hjarta Nuuk. Til að flytja hundrað gámaeiningar, þrjá krana, vinnuvélar og sexhundruð niðurrekstrarstaura hittist svo vel á að nýtt flaggskip Grænlendinga átti leið um Ísland um páskana.

„Við komuna til Nuuk var tekið vel á móti skipinu, sem var í sinni jómfrúarferð. Skipinu var gefið nafn í leiðinni, - með farminn okkar um borð.“

Það reyndist flóknara að flytja mannskapinn, enda ekkert áætlunarflug.

„Þannig að við þurftum að leigja flugvél, - tókum upp á því að leigja flugvél frá Mýflugi.“

Grænlendingar taka þó engan séns á því að starfsmenn Ístaks beri með sér veiruna inn í landið frá Íslandi.

„Við fengum þá testaða hjá Íslenskri erfðagreiningu. Hver og einn fékk sitt vottorð þaðan, sem þeir tóku svo með sér til Nuuk, og það var tekið gott og gilt og mannskapurinn gat farið að hefja störf á staðnum.“

Vinnusvæðið er samt það sem Karl kallar vinnandi sóttkví. Starfsmanna bíður svo annað próf, til viðbótar því sem tekið var á Íslandi.

„Og eftir fimm daga í Nuuk þá fer hann í annað test þar. Og ef hann er neikvæður út úr því testi þá fær hann leyfi til að labba um bæinn. Annars á hann bara að halda sig á vinnusvæðinu okkar.“

Ístaksmenn segjast þó spenntir að hefja þetta þriggja ára verkefni á Grænlandi enda hafi þeir mikla reynslu þaðan.

„Þetta verkefni er stórt og þetta verkefni er bara sniðið að okkur líka, má segja. Og við erum bara vel gíraðir í þetta og mjög spenntir,“ segir Karl Andreassen framkvæmdastjóri.

Hér má sjá frétt Stöðvar 2: