Swedbank kærður vegna peningaþvættis

Breski fjárfestirinn Bill Browder hefur kært sænska bankann Swedbank til saksóknara og fjármálaeftirlitsins í Svíþjóð vegna peningaþvættis. Nokkrir stærstu bankar Skandinavíu hafa nú verið sakaðir um að hafa hagnast á stórfelldu peningaþvætti fyrir vafasama aðila í Rússlandi og víðar.

Í kærunni sakar Browder Swedbank, sem er stærsti banki Eystrasaltslandanna, um að hafa þvættað 176 milljónir dollara sem rússneskir embættismenn drógu að sér, að sögn Financial Times. Endurskoðandi Browder, Sergei Magnitskí, afhjúpaði spillingarmálið og var barinn til ólífis í rússnesku fangelsi árið 2009. Féð er sagt hafa farið í gegnum útibú Danske bank og litháenska bankann Ukio áður en það fór í gegnum útibú Swedbank í Lettlandi, Litháen og Eistlandi en einnig Svíþjóð.

Áður hefur Browder kært Danske bank og Nordea, tvo stærstu banka Norðurlandanna, fyrir peningaþvætti.

Swedbank fullyrðir að starfsmenn bankans hafi tilkynnt yfirvöldum um alla grunsamlega fjármagnsflutninga. Birgitte Bonnesen, bankastjóri Swedbank, hefur þó viðurkennt að „hætta“ sé á að grunsamlegar greiðslur hafi farið óvart í gegnum bankann.

Umfangsmestu ásakanirnar vegna peningaþvættis norrænna banka hafa fram að þessu beinst að Danske bank. Útibú danska bankans í Eistlandi er talið hafa verið notað til að þvætta jafnvirði hundruð milljarða íslenskra króna af illa fengnu fé frá 2007 til 2015.

Ásakanir um að allt að 5,8 milljarðar dollara af vafasömu fé frá Danske bank hefðu farið í gegnum Swedbank voru settar fram í sænsku fréttaþætti í síðasta mánuði. Bankinn er nú þegar til rannsóknar vegna gruns um innherjasvik í tengslum við birtingu þáttarins. Greint hefur verið frá því að stjórnendur Swedbank hafi varað stærstu hluthafa hans við því að ásakanir yrðu settar fram tveimur dögum áður en þátturinn birtist.

Browder er eigandi Hermitage-fjárfestingasjóðsins sem var áður umsvifamikill í Rússlandi. Eftir að hann lenti upp á kant við rússnesk stjórnvöld hefur Browder gerst afar gagnrýninn á ríkisstjórn Vladímírs Pútín forseta.

Upplýsingar sem Magnitskí komst yfir sýndu að spilltir rússneskir embættismenn hefðu þvættað skattfé sem þeir stálu í gegnum evrópska banka. Browder hefur sent gögn um meint peningaþvætti banka til yfirvalda í nokkrum Evrópuríkjum. Saksóknara hafa vísað sumum kærunum frá vegna þess að fyrningarfrestur brotanna er liðinn.