„Algjörlega stórkostlegur dagur“

Það verður ekki annað sagt en að Sólveig Anna Jónsdóttir, formaður Eflingar, sé í skýjunum með það hvernig verkfallsaðgerðir félagsins tókust til í dag.

Heimir Már Pétursson, fréttamaður, ræddi við hana og Ragnheiði Valgarðsdóttur, verkfallsvörð, í beinni útsendingu í fréttum Stöðvar 2 í kvöld en um 700 félagsmenn í Eflingu sem starfa við þrif á hótelum og gistiheimilum lögðu niður störf klukkan 10 í morgun. Verkfall þeirra stendur til miðnættis í kvöld.

„Mér finnst hafa tekist ótrúlega vel til,“ sagði Sólveig Anna spurð út hvernig dagurinn hafi gengið.

„Þetta hefur verið algjörlega stórkostlegur dagur, mögnuð samstaða, ótrúlega gaman að fá að vera hérna í dag og spjalla við allar konurnar. Við skiptumst á sögum og lífsreynslu okkar sem láglaunakonur. Gangan okkar var stórkostlega vel heppnuð þannig að já, þetta er búinn að vera frábær dagur.“

Ragnheiður sagði að verkfallsverðir hefðu náð að heimsækja flest öll hótelin á höfuðborgarsvæðinu þar sem hótelþernur höfðu lagt niður störf. Hún sagði eitthvað hafa verið um verkfallsbrot en ekki neinar ryskingar.

„Á einu hóteli fengum við ekki að komast inn en það var mikið um að deildarstjórar og millistjórnendur á hótelum hafi verið að ganga í störf hótelþerna og eitthvað um að hótelþernur hafi verið sjálfar að störfum,“ sagði Ragnheiður.

Á morgun lýkur atkvæðagreiðslu Eflingar og VR um mun víðtækari verkfallsaðgerðir sem hefjast síðar í mánuðinum ef þær verða samþykktar og ef ekki hefur tekist að semja um nýja kjarasamninga. Aðspurð hvort hún telji að af þeim aðgerðum verði sagði Sólvegi Anna:

„Við skulum sjá hvernig fer. En það er allavega eitt sem er alveg ljóst eftir þennan dag að við sem höfum litla reynslu af verkfallsundirbúningi erum búin að sýna og sanna að við getum sannarlega skipulagt mjög glæsilegar aðgerðir og ef til verkfalla kemur þá getum við staðið í verkfallsvörslu og gert allt sem við þurfum að gera.“

Hér fyrir neðan má sjá myndir sem Vilhelm Gunnarsson, ljósmyndari Vísis, tók í dag þegar verkfallsaðgerðirnar stóðu sem hæst í miðborg Reykjavíkur.